Ruošâst Kamtšatka njargâeennâm aldasijn tábáhtui stuorrâ eennâmtuárgástâs syeinimáánu 30. peeivi suulân peeli kulmâ Suomâ ääigi. Ovtâstum staatâi geologia tutkâmkuávdáá (USGS) mield eennâmtuárgástâs tábáhtui 19,3 km jieŋŋâlvuođâst já ton magnitud lâi 8,8 Richter ciäkkáduv mield. Koččâmušâst lii maailm stuárráámus eennâmtuárgástâs ive 2011 maŋa.
Eennâmtuárgástâs tovâttij tsunamipááruid Kuálhismeerâst. Enâmeh pirrâ Kuálhismeerâ evakuistii ulmuid já adelii tsunamiváruttâsâid, mutâ maŋeláá maaŋgah váruttâsah kiässojii maassâd, tastko pááruh lijjii-uv ucebeh ko ovdil nobdui. Alemuuh pááruh mitteduvvojii Havaijist. Toh lijjii 1,7 meetter alosiih.
Kreml tieđetteijee Dmitri Peskov mield kihheen ij jáámmám Ruošâst eennâmtuárgástâs ige tsunami keežild. Lammâšum ulmui meereest sun ij muštâlâm. Pááruh tuššâdii Ruošâst kuittâg rakânâsâid. Kamtšatka njargâenâmist rusoškuođij meid Kljutševskoi tullâvääri, já kuárdee laava kuulgâi ton rivte mield. Kljutševskoi lii Euraasia alemus aktiivlâš tullâvääri. Tot lii russoom vittii 2020-lovvoost.
Käldeeh:
– Tulivuori on alkanut purkautua Venäjän Kaukoidässä (yle.fi)
– Tsunami updates live (www.theguardian.com)
Kove: NadezhdaKhaustova (Wikimedia Commons)