Ruošâ president Vladimir Putin haalijd iäláskittiđ Intervision-lávlumkišto, mii tooimâi sosialistlij enâmij version Euroviisuin kolmâ suáđi ääigi. Ääšist muštâl ryeššilâš uđâstoimâttâh Tass.
”Idea ličij rähtiđ ollâ tääsi festivaal tego Intervision”, Putin muštâlij sahhiittâlmist.
Tass mield idea lii finnim torjuu Kiina president Xi Jinpingist. ”Mij iävtuttijm taam, já mii kiinaliih usteveh torjuu jurduu. Keččâp, mii tast šadda”, Putin eeđâi.
Intervision-lávlumkišto uárnejui iivij 1977−1980 Puola Sopotist. Ton madduuh láá Sopot lávlumfestivaalijn, moh láá tollum ive 1961 rääjist. Intervision-lávlumkišto njuolgâdusâi mield tábáhtume lavluin tiäduttuvvojeh ráávhu já ustevvuotâ.
Sosialistlij enâmij lasseen kistoin lâi fáárust meid Suomâ. Suomâ piergij Intervision-lávlumkištoin uáli pyereest, ko ive 1980 Marion Rung vuoitij pittáin Hyvästi yö. Rung lâi vuáittám Sopot festivaalij uáivipalhâšume ive 1974 pitáinis Uskon lauluun.
Suomâ uásálistem sosialistlii lávlumkiišton onnui tien ääigi luándulâžžân. Suomâ uásálistij sehe Euroviisuid já Intervision-lávlumkiišton, tastko Yle lâi áinoo eurooplâš finnodâh, mii kuulâi sehe sosialistlij enâmij OIRT-radioliiton já viestârenâmij EBU-almosradiounionân.
Ruoššâ ij uážžum uásálistiđ Euroviisuid ton maŋa ko eennâm volliittij Ukrainan ive 2022.
Käldee:
– Euroviisuista ulos heitetty Venäjä aikoo palauttaa kylmän sodan aikaisen laulukilpailun (www.hs.fi)
Kove: Mike Wall (Pixabay)