Heavy metal oovdâstjottee Ozzy Osbourne já algâalgâlâš Black Sabbath -juávkku čuojâtteh majemuu konsertis juávhu päikkikaavpugist Birminghamist Eŋlandist syeinimáánu 5. peeivi 2025. Puoh liipuh konsertân vuábdojii 16 minuttist, muštâl brittilâš The Mirror -aavis.
Konsert uárnejuvvoo Birmingham Villa Park -jyelgipállustadionist. Tábáhtuumeest Black Sabbath algâalgâliih jesâneh ađai lávloo Ozzy Osbourne, kitarist Tony Iommi, basist Geezer Butler já rumbal Bill Ward čuojâtteh oovtâst vuossâmuu keerdi 20 ihán. Siämmást taat lii meid majemuš kerdi, ko juávkku láávdást oovtâst. Ovdil konsert Black Sabbatháin Ozzy Osbourne áigu čuojâttiđ muáddi pitá soolokarrieeristis.
Black Sabbath vuáđudui ive 1968. Juávhu jesânijn Butler tiävdá taan ive 76 ihheed, eres jesâneh 77 ihheed. Majemui iivij Ozzy Osbourne lii karttâm macâttiđ konsertráiđuidis Parkinson-taavdâ tiet. Konsert Black Sabbatháin lii meid suu majemuš konsert ubânâsân.
Black Sabbath já Ozzy Osbourne lasseen tábáhtuumeest lávdásteh meid eereeb iärrásij Metallica, Pantera, Slayer, Alice in Chains, Gojira já Anthrax. Ton lasseen lyevdi oolâ kuárŋuh maŋgâ eres muusikmaailm tääsni, tego Guns n’ Roses -juávhu kitarist Slash já basist Duff McKagan, kitarist Tom Morello sehe Ozzy Osbourne kuhesáigásâš kitarist já ustev Zakk Wylde.
Liipui vyebdimist já toi ollâ hoodijn lii kullum ennuv kritiik. Liipuh maksii 235−1 000 eurod, mii maŋgâsij mielâst lii liijkás ennuv. Maaŋgah fanih vist iä kuhes vyerdimist huolâhánnáá ubâ uážžumgin liipuid konsertân. Villa Park -stadionân čäähih 42 000 olmožid.
Konsert uárnejeijeeh muštâleh, ete tábáhtume puoh vuáituh skeŋkkejuvvojeh täsipiälásávt kuulmâ pyeretovâlâšvuotâornijdâhân: Parkinson-tavdâsiärván, Birmingham párnáipyecceiviäsun já párnái laiđimtipšopááikán.
Ovdil puáttee keesi tábáhtume Black Sabbath lâi toollâm ”majemuu konsertis” ive 2017. Talle juávhust iä kuittâg lamaš fáárust puoh algâalgâliih jesâneh.
Käldeeh:
– Ozzy Osbournen ja Black Sabbathin jäähyväiskeikka myytiin loppuun 16 minuutissaa (yle.fi)
– Back to the Beginning (www.avfc.co.uk)
Kove: Warner Bros. Records (Wikimedia Commons)