Suomâ almai salibandyjuávkku vuoitij maailmmiäštárkištoid finalist Ruotâ vuástá moonnâm pasepeeivi Malmö Arenast. Speelâ puáđus lâi jotkâääigi maŋa 5−4. Taat lii viiđâd kerdi, ko Suomâ lii vuáittám almai salibandy maailmmiäštárkištoid.
Speelâ aalgâst oroi jo masa čielgâsin, ete Ruotâ ličij taan ive vyeittee. Ruotâ juávkku haldâšij speelâ vuossâmuu uásist já finnij kulmâ moolâ. Suomâ vist ij finnim oovtâgin. Ruotâ moolâid paččii Albin Sjögren, Johan Samuelsson já Emil Johansson. Nube uásist Malte Lundmark päjistij vala niäljád moolâ. Speelâ tile lâi talle 4−0. Forgâ tastmaŋa Heikki Iiskola čooskij vuossâmuu moolâ Suomâ juávkun. Vittâ miinut ovdil puudâ Justus Kainulainen luhostui finniđ vala nube moolâ Suomân. Kuálmád já majemuu uásist Kainulainen já Aaro Astala paijijn lase moolâid Suomâ juávkun, mon čuávumuššân speelâ tiileest šoodâi táásá 4−4. Spellâ moonâi jotkâááigán. Jotkâääigi Miska Mäkinen čooskij vuáittumoolâ Suomân. 28-ihásâš Mäkinen speelâi vuossâmuu keerdi maailmmiäštárkištoin.
Suomâ almai salibandyjuávkku vuoitij maailmmiäštárkištoid meid iivij 2008, 2010, 2016 já 2018. Ruotâ lii puoh pyeremustáá miänástum eennâm almai salibandy maailmmiäštárkištoin. Tot lii vuáittám kištoid luhhii. Almai salibandy maailmmiäštárkištoh láá tollum ive 1996 rääjist. Toh uárnejuvvojeh jyehi nube ive.
Käldee:
– Suomi on salibandyn maailmanmestari – käsittämätön nousu neljän maalin takaa (yle.fi)
Kove: News Oresund (Wikimedia Commons)