Anarâškielâ seervist lii eidu almostum André Kuipers párnáiroomaan ”Missio máhđuttem”. Tot lii jotkâ tagaráid kirjijd ko 3, 2, 1, GO! já Koodi ruopsâd!, moh almostuvvii anarâškielân iivij 2022–2023. Puoh kirjeh láá algâalgâlávt čallum hollandkielân. Missio máhđuttem -kirje lii jurgâlâm anarâškielân Sofia Olthuis. Eres kiirjijd lii jurgâlâm Marja-Liisa Olthuis.
Taan kirjeest André já Valentina orodává tego olmâ astronauteh komovuotâsajattuvâst. Professor Korolov koijâd sunnust iše tehálii mutâ meiddei super-syeligâs iskosân komovuođâst. André eeppid. Tot oro lemin hirmâd mielâkiddiivâš, mutâ meiddei varâlâš. Talle larmâdâs olvoškuát. Komovuotâšlaamburpittá kirdá njuolgist komovuotâsajattuv suundán… Taat lii jiäráskittee fiäráán uccâ astronautijgijn, mii fáálá lohheid hävskis, suámálijd já eromâš tiäđuid komovuotân maađhâšmist.
Muštâleijen lii André Kuipers, vuosmuš vuáládâheennâmlâš astronaut, kote lii kirdám kuohtii
komovuotân. Sun aasâi já poorgâi 204 peivid Aalmugijkoskâsii komovuotâsajattuvâst.
Anarâškielâ servi uárnee komovuotâeehid uđđâivemáánu 2. peeivi 2025 tme 14.00–16.30 Auditorio Dollast Sajosist. Tot lii meiddei ”Missio máhđuttem” -kirje almostittemtilálâšvuotâ. Kirje čällee, hollandlâš ESA-astronaut André Kuipers, puátá Aanaar Sajosân muštâliđ komovuotâjotteem puátteevuođâst. Jis tun halijdah teivâđ olmâ astronautáin, finniđ suu nommâčalluu kiirján já väldiđ kove suin, te puáđi peri fáárun!
Kirje puáhtá jo uástiđ Duodji Shopist Sajosist. Ennuv luuhâmmohtâ uđđâ kirjijn!
Kove: Fabrizio Brecciaroli