Skammâmáánust paijeel 150 olmožid 20 enâmist kištottâllii espanjakielâlijn Scrabble-maailmmiäštárkištoin Granada kuávlust. Vyeittee lâi Nigel Richards. Sun lii uđđâseelandlâš almai, kote áásá Malesiast. Eromâš mielâkiddiivâžžân taam ääši taha tot, ete sun ij ubâ määtigin espanjakielâ.
Taan ive espanjakielâliih Scrabble-kištoh iä lah vuossâmuuh, maid Richards lii vuáittám. Sun lii lamaš eŋgâlâskielâlâš Scrabble-maailmmiäštár vittii já lii vuáittám maaŋgâid eres stuorrâ Scrabble-kištoid ovdâmerkkân Ovtâstum staatâin, Ovtâstum kunâgâskoddeest, Singaporest já Bangkokist. Ton lasseen sun vuoitij ranskakielâlijd maailmmiäštárkištoid ive 2015 já 2018, veikkâ sun ij sáárnu ige ibbeerd ranskakielâ. Tai kištoi várás sun lâi luuhâm ranskakielâlii Scrabble-sänikirje oovce oho ääigi já oppâm ton saanijd paajeeld. Säänih lijjii suullân 386 000.
Richards lii uásálistám Scrabble-kištoid masa kulmâlov ihheed, já sun annoo puoh aaigij pyeremussân Scrabble-spellen. Suu kievrâvuotân annojeh eromâšávt suu čuovâkovemušto sehe nahcâ rekinistiđ jotelávt matemaattisijd tuođânálásâšvuođâid. Scrabble lii sänispellâ, mon keksij ovtâstumstaatâlâš Alfred Mosher Butts 1930-lovvoost. Spellâ lii almostum paijeel 120 enâmist paijeel 30 kielân.
Käldeeh:
– Scrabble star wins Spanish world title – despite not speaking Spanish (www.theguardian.com)
– Winner Of French Scrabble Title Does Not Speak French (www.npr.org)
Kove: thebarrowboy (Wikimedia Commons)