Espoo Ciné -elleekovefestivaal uárnejui 23.8.–1.9.2024. Taan ohtâvuođâst juáhhojii meid Espoo Ciné -palhâšumeh.
Plaakaatkišto vuoitij nuorttâlâškielâg elleekove Je’vida plaakaat, mon raahtij Pauliina Heikkinen. Kišto vyeittee valjij kovetaaidâr Teemu Keisteri ađai taan ive Suomâ Euroviisui ovdâsteijee Windows95man. Keisteri mielâst valjim lâi älkkee.
”Persovnlávt mun rähistâm klassiklijd já oovtâkiärdánis tuojijd, nuuvt ete vyeittee valjim lâi älkkee. Plaakaat lii herkki já ucánjáhháá melankolisâš, tot njama keččee jieijâs siisâ. Tast lii eromâš čapisvielgis čuovâkove sehe oovtkiärdánis stijlâsâš estetiik”, Keisteri vuáđustij.
Je’vida -elleekove plaakaat rähtee Pauliina Heikkinen lâi ilolâš já kijttevâš palhâšuumeest.
”Lii lamaš ilo já kunnee leđe uási Je’vidast, mii lii eromâš herkis, mučis já tehálâš maainâs. Takkâ Espoo Cinén tast, ete onne ij juhluu tuše syemmilâš elleekovetaaiđâ, peic lii halijdum pajediđ meid syemmilâš plaakaattaaiđâ.”
Keisteri valjim plaakaatkišto vyeittee lasseen palhâšui meid keččei jiellâhplaakaat. Keččeejienâstmist vuossâmuu saje uážui Juhamatti Vahdersalo rähtim plaakaat Ilveskuiskaaja-elleekove várás.
Espoo Ciné -palhâšume vuoitij taan ive čaittâleijee Laura Birn. Ive 2021 rääjist taat palhâšume lii juohhum jyehi ive taggaar ornijdumán teikkâ ulmui, kote lii ovdedâm syemmilii elleekovekulttuur. Sinun Ciné -palhâšume vist moonâi taan ive Yasmin Najjarân. Sinun Ciné -ideakišto lii uáivildum tagaráid elleekoverähteid, kiäh láá vala karrieeris aalgâst.
Käldeeh:
– Poster Ciné -kilpailun voitti Je’vida (espoocine.fi)
– Espoo Ciné -palkinto Laura Birnille (espoocine.fi)
Kove: Tung Lam (Pixabay)