Wayuu-algâaalmug siärvádâh palhâšui ive 2024 wikimedistin. Wayuuh ääsih Guajira njargâenâmist, mii lii Nuorttâ-Kolumbia tavemuu uásist já Viestâr-Venezuela taveuásist. Wayuu-aalmug kielâ lii wayuunaikikielâ, mast láá suullân 400 000 sárnod. Wayuunaikikielâlâš Wikipedia almostui kuovâmáánu 27. peeivi 2023. Tast kávnojeh 576 artikkâlid.
Taan ive wikimedist ađai wayuu-siärváduv oovdâst Leonardi Fernández, kii lii sosiaal- já kulttuurantropologia uáppee Zulia ollâopâttuvâst. Sun lâi ohtâ tain ulmuin, kiäh puohtii wayuu-siärváduv Wikimedia-projektáid. Fernández lii meid wayuunaikikielâlii Wikipedia paijeentuállee. Sun ibbeerd pyereest, mon tehálâš lii, ete algâaalmugijn lii máhđulâšvuotâ jyehiđ jieijâs historjá jieijâs kielân. Tonttáá algâaalmug siärváduvah, tego wayuu-aalmug, iä uážu tiäđuid jieijâs kielân, pic váldukielân. Talle sij uáinih tiäđuid alnestis, moh láá muštâlum sist, mut siittáá. Wikipediast já eres Wikimedia-projektijn wayuuh jieijah pyehtih jyehiđ tiäđuid, jieijâs kielân. Fernández lii tuárjum wayuunaikikielâ projektijd, stivrim Wikipedia-škovliittâs siärváduvásis sehe jurgâlâm stuorrâ uási Wikipedia viestâin já kočomijn.
Ij lah lamaš älkkee vuáđudiđ wayuunakaikielâlii Wikipedia: pargopáájái uásiväldeeh ferttejii jotteeđ enâmij raajij rasta, já távjá sist vailuu tiätturrustigeh já internetohtâvuotâ, moiguin ovdediđ siskáldâs. Ton lasseen koolgâi meid ovdediđ digitaallijd tááiđuid já pyehtiđ lase ibárdâs jieš Wikipediast.
Ive wikimedist -palhâšumeh juáhhojeh jyehi ive tagaráid ulmuid teikkâ siärváduvváid, moh láá eromâšávt ovdedâm Wikipedia já eres Wikimedia-projektijd.
Käldee:
– Meet the Wikimedians of the Year 2024 (diff.wikimedia.org)
Kove: Jasmina Schreck