Pariisi olympialijn ohtân kištottâllâmšlaaijân lii triathlon, mon kištopeivi lii jo sirdum hyenes čäcikvaliteet keežild. Triathlon vuoijâmuási lii vuávájum Seinejuuhân. Seinejuuvâ čääsi kvaliteet lii lamaš stuorrâ huolâ olympialij uárnejeijeid. Ranska organisaatio já eres virgeomâhááh láá nonnim, et čääci lii oornigist talle ko olympialij triathlon álgá. Näävt ij lah kuittâg keevvâm.
Pasepiäiván vuávájum triathlonhárjuttâllâm lii jo macâttum hyenes čäcikvaliteet keežild, já almai triathlon lii sirdum majebaargâst koskookon siämmáá suujâ keežild. Koskoho kišto viijmâg tollui.
Lii lamaš ennuv savâstâllâm tast, et jis triathlon ličij-uv kištottâllum duathlonin, adai vuoijâmuási ličij macâttum ollásávt, já kištoost liččii lamaš tuše pyeráinvyeijim já kaččâm. Jis triathlon ličij muttum duathlonin, te tien tááhust kištoost liččii lamaš kaččâm, pyeráinvyeijim já loopâst val nubbe kaččâm.
Čuolmân Seinejuuvâ čääsist lii lamaš E-kolibakteerij meeri. Taah bakteereh puátih ulmui já ellei pooškâin. Pariisist lii arvam ennuv majemui peivij, já Pariisi tuolvâčäcisysteem ij lah kierdâm stuorrâ arvečäcimeerijd. Nuuvtpa tuolvâčääsih luáštojeh talle Seinejuuhân, mii tuálvá. Pariisist lii kuittâg lopedum arve meid koskookon, nuuvt et lii kuhháá lamaš epivises, ličij-uv vuoijâmčääci valagin tuárvi putes kištoi orniimân.
Jis olmooš vuojâd tuolvâ čääsist, mast láá E-kolibakteereh, te sun máhđulávt puáccáá vyeksim- já luččâtaavdân. Tot ij lah hirmâd varâlâš mut toovât kale kištoid já kištottâlleid váiváás tile. Motomeh valastâlleeh láá puurrâm visesvuođâ tiet antibiootijd, amas sij puáccáđ vuojâdâtmist. Sij kuittâg NOS mield láá čielgim, et antibiootij sijđovaiguttâs lii čuávjitoppiittâh, ige totkin lah nuuvt vuovâs, mut totkin ij puáđi koččâmušân, et sij iä uásálistáččiigin kiišton.
Seinejuuvâ čäcikvaliteet annoo čalmeest ubâ ääigi, já peeivi raportijn uáinoo, et tääl tile lii puáránâm tuárvi ennuv. Epivises tilán lii vaiguttâm ennuv tot, et koskookon lii lopedum arvešoŋŋâ.
Algâalgâlávt triathlon lâi kolgâđ tolluđ majebargiiđeed tijme 8.00.
Šiev peellin kištošlaajâi sirdemist lii lamaš valastâllei uáinust tot, et sii roppâ lii kiergânâm pyerebeht hárjániđ pakkâ šooŋân. Kištopiäiván lii lopedum 30 ceehi paahâs.
Käldee:
– Triatlon mogelijk zonder zwemmen in vervuilde Seine: ’Duatlon zou slecht nieuws zijn’ (nos.nl)
– Seine nog altijd te vervuild voor olympische triatlon, wedstrijd mannen uitgesteld (nos.nl)
– Seine nog altijd te vies: eerste olympische triatlontraining afgelast (nos.nl)
Kove: ailsaruth (Pixabay)