Eestieennâm, Latvia já Liettua luovâneh Ruošâ haldâšem šleđgâviärmáduvâst kuovâmáánust 2025. Taan räi taah enâmeh láá juáhám šleđgâviärmáduv Ruoššáin já Vielgis-Ruoššáin.
Ääšist muštâlij Liettua energiaminister Dainius Kreivys. ”Mij lep ain tiättám, et tego mist lii šoddâm uási Euroop unionist já Natost, te mist šadda meid uási eurooplii šleđgâvuáháduvâst,” sun čaalij Facebookist Reuters mield.
Kuulmâ eennâm uáiviministereh vuáláčallii porgemáánust 2023 ohtâsii almosciälkkámuš, mast almottui áigumušâin luovâniđ Ruošâ haldâšem Brell-šleđgâviärmáduvâst sehe servâmist viestâreurooplii vuáhádâhân majemustáá kuovâmáánust 2025. Almosciälkkámušâst Ruošâ haldâšem viärmádâhân kuullâm onnui uhken Baltia enâmij energiatorvolâšvuotân.
Miärádâs nannaam-Euroop vuáhádâhân servâmist tohhui ive 2018, ko haahâ finnij EU-ruttâdem. Baltian enâmeh servih šleđgâviärmádâhân Puola peht.
Baltia enâmeh lijjii Sovjetlito haaldust nube maailmsuáđist ive 1991 räi, já toh ärbejii šleđgâvuáháduv tien ääigist.
Käldee:
– Baltian maat irtautuvat yhteisestä sähköverkosta Venäjän kanssa (www.hs.fi)
Kove: Couleur (Pixabay)