Ovtâstum staatâi väripresident Kamala Harris lii áinoo demokraatij iävtukkâs čoovčâ presidentvaaljâin, tieđeet demokraatlii piäláduv stivrâ.
Majebaargâ koskâiijâ páihálii ääigi lâi deadline, mon räi vyesti-iävtukkâsah puohtii almottittiđ iävtukkâssân. Eres iävtukkâsah iä ittáám. Stivrâ lii lopedâm, et piäláduvâst lii presidentiävtukkâs majemustáá porgemáánu 7. peeivi ađai puorijn aigijn ovdil Chigago piäládâhčuákkim porgemáánu 19.–22. peeivi.
Harris pajanij presidentiävtukkâssân Joe Biden kiäsádâttâm keežild, já sun lii jo finnim noonâ torjuu tobdos demokraatijn. Käävci piäládâhjesânid lovveest eteh, et sij kyeditteh Harris. Taat toorjâ uáinoo meid ruđâlávt: Harris lii jo čokkim 200 miljovn dollarid ađai nyevt 184 000 miljovn eurod presidentvaaljâi kampanjan. Nyevt 170 000 uđđâ rijjâtátulâžžâd láá almottâm, et sij tuárjuh Harris kampanja. Piäláduv mield 66 prosentid čoggum ruuđâin láá puáttám uđđâ skeŋkkejeijein.
Piäládâhčuákkim valduuttem ulmuuh uárnejeh porgemáánu 1.–5. peeivi nettijienâstem, mast Harris virgálávt nomâttuvvoo presidentiävtukkâssân. Taan maŋa sun váldá iävtukkâsvuođâs virgálávt vuástá piäládâhčuákkimist.
Harris kištottâl presidentvaaljâin republikaanij iävtukkâssáin, ovdijn presidentáin Donald Trumpáin.
Käldee:
– Geen tegenkandidaten voor Kamala Harris (nos.nl)
Kove: The White House (Wikimedia Commons)