Neljinubáloh ryeššilâžžâd valastâlled láá uážžum love uásálistiđ olympialáid, moh uárnejuvvojeh taan ive Pariisist. Nuuvt almottij aalmugijkoskâsâš olympiakomitea (KOK) lávurduv. Love láá finnim meid ohtnubáloh valastâlled Vielgis-Ruošâst.
KOK almostitij listo 25 ovtâskâs valastâllest, kiäh láá valjimtoháliih. Taah valastâlleeh kolgii čođâldittiđ tarkkuumijd, maid uárnejii aalmugijkoskâsiih šlajâlitoh sehe KOK. Tain tarkkuumijn selvâttui, ete valastâlleeh iä aktiivlávt tuárju Ruošâ suáđi Ukraina vuástá.
Ryeššiliih já vielgisryeššiliih valastâlleeh kištottâlleh neutraallii liipu vyelni iäge sijjân čuojâttuu aalmuglâšlavluuh. Valastâlleeh, kiäh ožžuu lávurduv love uásálistiđ olympialáid Pariisist, kištottâlleh maađijpyeráinvyejimist, trampoliinlášmuttâlmist, tiädduluptiimist já hiäibumist.
KOK almottij jo njuhčâmáánust, ete ryeššiliih já vielgisryeššiliih valastâlleeh iä uážu uásálistiđ kištoi lekkâmjuhlijd tondiet ko sij uásálisteh kištoid priivaat olmožin iäge mongin eennâm juávhust.
Olympiakištoh älgih syeinimáánu 26. peeivi.
Käldeeh:
– Päätös tuli: Venäjän urheilijoilla ei ole asiaa Pariisin olympialaisten avajaisiin (www.hs.fi)
– 14 venäläisurheilijaa sai luvan osallistua Pariisin olympialaisiin (www.hs.fi)
Kove: PublicDomainPictures (Pixabay)