Ovtâstittum kištottâllee Ilkka Herola uulâi kuhes karrieeris pyeremuu puátusân majebaargâ ko sun vuoitij proonsi stuorrâ njuškimluáhá kištoost Milano–Cortinast. Herola vuolgij čuoigâmuásán 32 sekuntid njunnooš maŋŋaal. Hárjuttâsâin pyereest njuškim Herola lâi pettâšum kištonjuškim maŋa. Jieijâs mielâst sun njuškij puoh hyenemuu njuškiimis, já nuuvt miitaaltaištâlem oroi meendu kukken, tastko čuoigâmsijvo lâi jotelub ko normaalluáhást.
Čuoigâmuási ääigi Herola kuittâg vaaldij jo vuosmuu vuástáluvvâst puohâid kiddâ eereeb Nuorttâriijkâ Johannes Lamparter. Váldujuávkku finnij kuittâg pelimudo maŋa Lamparter kiddâ.
Mitaleh juáhhojii majemuu čuoigâmmohheest Herola, Lamparter já kole vuáittám Taažâ Jens Lurås Oftebro kooskâst. Algâmääđhist korrâsávt čuoigâm Herola paasij majemuu vuástáluvvâst, mut liijká sun toolâi puohâid iärrásijd tyehin. Iäru niäljád sajan šoodâi 27,1 sekuntid.
Herola ovtâstit Puijon hiihtoseura. Sust láá persovnliih čyegissajeh Pyeong, Peking já Milano–Cortina olympialijn. Tääl niäljádijn kištoinis sun vuoitij miitaal. Taat árvukištomiitaal lii sunjin nubbe: Oberstdorf MM-kištoin 2021 sun vuoitij siilbâ.
Ovdebáá tove Suomâ lii finnim eenâb ko oovtâ miitaal ovtâstittum kištoin Salt Lake Cityst 2002, ko Samppa Lajunen vuoitij já Jaakko Tallus šoodâi nubben.
Käldee:
– Milano-Cortina 2026: Ilkka Herolan vuoro ottaa olympiamitali yhdistetystä (www.olympiakomitea.fi)
Kove: Ailura (Wikimedia Commons)