Pegâlmâs brittilâš poprockbändi Coldplay lii ucedâm jieijâs čiđđâjyelgiluodâ masa 60 prosentáin, jis puáttus verdid ton ovdebáid stadionkonsertáid. Coldplay lávdástij Helsig olympiastadionist syeinimáánust, já konsert ääigi kuldâleijeeh pyevtittii šleeđgâ.
Muusikjuávkku Coldplay lii halijdâm jo kuhháá ucediđ jieijâs konsertij energiakevttim. Ive 2022 rääjist šleeđgâ pyevtittem Coldplay konsertij ääigi lii lamaš máhđulâš šleeđgâ pyevtitteijee tanssâluovdij peht já generaattortuolmâmpyeráiguin. Konsertij kuldâleijei pyevtittem šleđgâ lii kuittâg iänááš-uv symbollâš.
Tanssâlyevdih pyevtitteh šleeđgâ lihâstâhenergia peht. Pyevtittum šleđgâvirde sirdâšuvá aakun, mii lii algâaalgâlávt vuávájum BMW šleđgâauton, já tot lii talle kiävtust čuávuváá konsert várás. Coldplay lii almottâm, ete kuldâleijeeh láá pyevtittâm suullân 17 kWh oovtâ konsert ääigi. Tot pijsáá uccâ lyeve čuovâ- já jienâmašinij šleđgâtárboid.
Šleeđgâ pyevtittittee tanssâlyevdih iä lah tuše Coldplay kiävtust, pic toh láá kevttum jo ovdil ovdâmerkkân klubijn já meesuin. Tanssâluovdij lasseen Coldplay konsertijn puáhtá tuolmâđ šleđgâpyevtittittee tuolmâmpyeráin. Toin naalijn pyevtittuvvoo šleđgâ lihâstâhenergiain siämmáánáál ko tanssâluovdij alne-uv.
Pegâlmâs muusikjuávkku lii ráhtám meid 12-uáság vuávám, mon ulmen lii ucediđ čiđđâjyelgiluodâ. Tot siskeeld ovdâmerkkân lopádâs kalveđ oovtâ muorâ jyehi vuobdum konsertliipust, já tääl sij láá-uv jo kalvam suullân čiččâm miljovn muorrâd.
Käldeeh:
– Coldplay valjasti yleisönsä tuottamaan sähköä, mutta sähköntuotanto on ollut lähinnä symbolista (www.hs.fi)
– Tour emissions update (www.coldplay.com)
Kove: Raph_PH (Wikimedia Commons)