President Alexander Stubb mađhâšij vuosmuu paje-Laapi virgemookán 23.–24.5.2024 Anarân já Ucjuuhân. Määđhi ääigi sun teeivâi ovdâmerkkân párnáigijn já nuorâigijn sehe Sämitige, kieldâi já Säämi palgâsij ovdâsteijeigijn. Ucjuuhân sun mađhâšij helikopteráin já iberdij, mon viijđes Sämikuávlu lii.
Vástuppeeivi iđedist Stubb teeivâi Sämitige ovdâsteijeigijn Anarist Sajosist, já ton maŋa sun uápásmui Sämimuseo já luándukuávdás Siidan. Peeivi loopâst sun teeivâi vala uáppeigijn Avelist škovlâ- já kulttuurkuávdás Kaarre šiljoost. Tobbeen uáppeeh meid pessii sahhiittâllâđ president.
Median sun eeđâi, ete ana tehálâžžân, ete sämmilij vuoigâdvuođah láá visásmittum vuáđulaavâ miäldásávt. Sun meid tuáivu, ete uđđâ Sämitige laahâ olášuvá taan haldâttâspaje ääigi. President mielâst ton valmâštâllâm lii pištám liijkás kuhháá. Sun áigu koččođ Sämitige jotkâsavâstâlmân presidentlaanan. Sun meid tuáivu, ete uážžu Sämitige ovdâsteijee fáárun ovdâmerkkân OA-tievâsčuákkimân čohčuv.
Meid kielâkoččâmušâid sun pajedij savâstâlmân. President haalijd tuárjuđ sämmilij kielâ já kulttuur. Sun lâi uáli lijkkuustum toos, ete maht anarâškielâ já nuorttâlâškielâ láá iäláskittum muádilov ive ääigi. Kielâpolitiikân já toos, maht tom puávtáččij väldiđ olgopolitiikân, sun ij kuittâg máttám väldiđ uáivil.
President eeđâi, ete mokke lâi eenâb-uv oppâmmätki, já sun poođij viežžâđ tiäđu já jurduid pargoniävvun puátteevuođâ várás. Määđhist sun helikopter lasseen uápásmui Aanaar kieldân ovdâmerkkân šleđgâtuolmâmpyeráin vyeijimáin já kaačân. Torvoalmaah-uv pissuu fáárust.
Kove: Henna Tervaniemi