Suomâ kuhemus jieŋâs Oulunsalo já Hailuoto kooskâst ij lekkâs taan täälvi meendu rašes jieŋâi tiet. Nuuvt tieđetteh Tave-Pohjanmaa IJP-kuávdáš já Varsinais-Suomâ IJP-kuávdáš ohtsii tiäđáttâsâst. Veikkâ taan täälvi láá lamaš korrâ puolâšeh, tááláš jieŋâtile ij toovâ máhđulâžžân rähtiđ já paijeentoollâđ Hailuoto jieŋŋâs torvolávt. Jotolâh Oulunsalo já Hailuoto kooskâst juátkoo autotamppáin.
Jieŋâtile Hailuotost puáhtá mulsâšuddâđ uáli jotelávt piegâ, čäcialoduv mulsâšuddâm já muotâtile tiet. Miärádâsân, ráhtoo-uv jieŋâs vâi ij, vaaigut jieŋâ assaavuođâ čuávvum. Ton lasseen váldoo huámmášumán kuhes ääigi ennustâs piegâst, liegâsvuođâst já arvemeereest. Jieŋâ ferttee leđe ucemustáá 40 senttid assaa, vâi jieŋŋâs puáhtá lekkâđ torvolávt. Tääl tot lii lamaš tuše 34 senttid assaa. Ton saajeest, kost jieŋâs táválávt ráhtoo, láá lamaš meid puolâšluoddiittuvah. Ennustâsâi mield lii piivâldmin, já tondiet IJP-kuávdáš ij osko, et jieŋâst šodâččij innig tuárvi assaa taan tälvipaje.
Jieŋŋâs lekkâm lii lamaš epivises meiddei ovdebái iivij. Táválávt jieŋâs lii lekkâsâm kuovâ-njuhčâmáánust.
Ive 2022 jieŋâs kiddejui tuše muáddi peeivi ton lekkâm maŋa, ko piäluštâspargee vuájui jieŋâ vuálá já hevvânij jieŋŋâs huolâttâskuávlust eidusii jieŋŋâs ulguubeln. Ton maŋa torvolâšvuotân lii kiddejum vala eenâb huámmášume ige lah lamaš visesvuotâ tast, puáhtá-uv jieŋâs puátteevuođâst ubâ innig lekkâđ.
Käldeeh:
– Suomen pisintä jäätietä Oulusta Hailuotoon ei avata tänä talvena liian heikon jään takia (yle.fi)
– Hailuodon jäätie on suljettu kokonaan tältä talvelta – nyt selvitetään, voidaanko tietä enää tulevina vuosina avata (yle.fi)
– Hailuodon jäätietä ei avata talvikaudella 2023–2024 (www.sttinfo.fi)
Kove: Jasmina Schreck