Aanaar škoovlâ šiljosählyturnam pronssispellâ já fiinaal spiällojii vástuppeeivi 9.2. tuođâlii tälvišooŋâst, ko puolâšmittár čaaitij -27 cekkid. Finalân lijjii taištâlâm pálgás káávcád- já oovcádluokkaliih. Moolâvaavtah iävá tarbâšâm vuordâččiđ, tastko spellâ lâi uáli jo jiäráskittee, já máhđulâšvuođah moolâ päčimân lijjii valjeeht kuohtuin juávhuin.
Muáddi miinut ovdil loppânjurgim káávcádluokkaliih rohhááttii, já David Lubach paajij páálu moolân. Ovdil tom Lubach lâi irâttâm moddii moolâ, mut oovcádluokkalij moolâvahtâ Eero Niva lâi luhostum estiđ tom jyehi tove. Moolâ maŋa oovcádluokkaliih vollitškuottii korrâsubbooht, mutâ káávcádluokkalij piäluštâs piiđij majemuu miinut räi, já čovgâ spellâ nuuvâi 1–0. Turnam uárnejeijee, máttáátteijee Ailu Näkkäläjärvi, ana káávcádluokkalijd olâttâsvyeitten.
– Semifinalist Sulo Tervaniemi luhostui pääččiđ kulmâ moolâ maŋaluvâi, rámmoo Näkkäläjärvi.
Ovdil fiinaal spellui pronssispellâ máttáátteijei já čiččâdluokkalij kooskâst. Oovdeb peeivi semifiinaal maŋa tuámmárkodde lâi hilgom máttáátteijei prooteest, mutâ pronssispellâ vuolgij joton ohtsâšibárdâssáin. Ovdil speelâ ohtâ nubástus tohhui speelân máttáátteijei tuoivust: pállu lonottui fiskâdist ruopsâdin.
Spellâ lâi čoovgâs, já kolmâ tälviáimu lâi koorâs kiäppáid. Máttáátteijei moolâvahtâ Saammâl Morottaja já piälušteijeeh ferttejii leđe kocemin, tastko čiččâdluokkaliih volliittii aalgâ rääjist. Máttáátteijeeh lonottii spelleid távjá já piäluštâs killái. Speelâ loppâkeejist čepis mailakevttee Mubemihkkal Juntunen (7. lk) luhostui pääččiđ páálu moolân kyehti miinuut ovdil loppânjurgim. Tast aalgâi korrâ taištâlem, já čiččâdluokkalijn lijjii čielgâsávt vädisvuođah piäluštmist. Máttáátteijei moolâvahtâ kuođij moolâs já vuolgij fáárun vollitmân, mutâ Juntunen ávhástâlâi tiilijn já paajij tállán páálu kuárus moolân. Spellâ nuuvâi 2–0 čiččâdluokkaláid.
Turnam puáđusoornig: 1. káávcádluokkaliih, 2. oovcádluokkaliih 3. čiččâdluokkaliih. Niäljádin pottii máttáátteijeeh. Kulmâ pyeremuu juávhu palhâšuvvojii njálgáiguin já aplodijguin.
Kaisa Tikka-Morottaja
Koveh: Kaisa Tikka-Morottaja