Suomâ ovdâsteijee taan ive Euroviisuh-lávlumkiišton čielgâi lávurduv 10.2. UMK-finalist Tamperest. Finalist enâmustáá jienâid finnij Windows95man ađai taaiđâr Teemu Keisteri. Suu skipárin läävdi alne lâi lávloo Henrik Piispanen. Sunnuu pitá nommâ lii ”No rules”.
Windows95man faalâi Uđđâ muusik kištoost (UMK) mielânpäccee lávdástem. Show aalgâst läävdi alne lâi jietânâsmane, mii lâi kiessum farkkukággá siisâ. Mane pajeuási lekkâsij, já ton siste viällái Windows95man, kote láávlui ”No rules”. Sust lâi pajalist päiđi já koibâkappeer, main lâi Windows95 logo, já jyelgist lijjii liškeivnásiih uccpuvssiih. Pitá loppâkeejist almeest seivuu ucessiähá farkkušoorcih, maid sun finnij juálgásis. Henri Piispanen lávdástij siämmái uccâ farkkušorcijguin, mutâ sust lâi pajalist farkkupäiđi já kuhes farkkukägispittáin rahtum takki.
Finalist lávdástii čiččâm artistid. Finalisteh lijjii vyeittee lasseen Sini Sabotage (Kuori mua), Jesse Markin (Glow), Sara Siipola (Paskana), Cyan Kicks (Dancing with Demons), Mikael Gabriel x nublu (Vox populi) já Sexmane (Mania).
Kišto jođetteijeeh lijjii kuulmâs: oovdiš Miss Suomi Viivi Pumpanen, lávloo Benjamin Peltonen já čaittâleijee Pilvi Hämäläinen. Kišto čielgejui meiddei taan ive kyevti sämikielân: anarâškielân čielgij Heli Huovinen já tavesämikielân Linda Tammela. Kištopitái lasseen UMK finalist uáinojii läävdi alne ovdebij iivij UMK finalisteh já Euroviisui ovdâsteijeeh tego Johannes Brotherus Kuumaa-juávhust Benjamin Peltosáin, Katri Helena já loopâst vala Erika Vikman Käärijäin.
Finalist aalmugijkoskâsâš rääđi adelij uási jienâin, já uási jienâin pottii kišto keččein Suomâst. Rääđi jienâi tiädduárvu lâi 25 % já keččei jienâi 75 % puoh adelum jienâin. Sara Siipola finnij enâmustáá aalmugijkoskâsii rääđi jienâid, já Windows95man vist ucemustáá. Suomâst keččeeh lijjii kuittâg čielgâsávt vissáseh tast, ete puoh pyeremus pittá lii ”No rules”. Windows95man uážui ohtsis 313 jiennâd (rääđist 28 já keččein 285). Nubben poođij Sara Siipola 273 jienáin.
Keisteri jieš kommentistij puáttus návt: ”Taat lii aaibâs nuuvtko utopia. Muoi láim majemuuh. Já talle paifakkist muoi láán vuossâmuuh”.
Sáttá leđe, ete sun ferttee mutteđ artistnoomâs Euroviisui lávdástem várás. EBU (Euroop yleisradiounion) lii tärkki markkânistmist, já tággáár kevttimvuáháduv nommâ ij veltihánnáá tuhhiittuu artist nommân. Keisteri ij kuittâg lah huolâstum, veikkâ noomâ ferttiiččij mutteđ: ”Muoi láán uážžum čuođij mield iävtuttâsâid. Já munnuu energia kale itá uáinusân läävdi alne huolâhánnáá tast, mii pääiđist lohá.”
Sun meiddei muštâl pitá noomâst: ”Taat lii lamaš muu motto jo kuhháá. Eellim já maailmtile láá motomin vaigâdeh já argâpeeivij kooskân-uv taarbâš ilo. Tom mun halijdâm čäittiđ, já mun halijdâm jyehiđ ovdâskulij šiev energia.”
UMK-kišto vyeittee oovdâst Suomâ 7.–11.5.2024 Euroviisuin Malmöst Ruotâst. Kištoost láá kyehti semifiinaal, já Suomâ vuáru lii vuossâmuu semifinalist 7.5.2024. Fiinaal uárnejuvvoo vyesimáánu 11. peeivi.
Käldeeh:
– Windows95man voitti UMK:n – duo voi joutua muuttamaan artistinimensä viisulavoja varten (www.hs.fi)
– Windows95manin nimeä ei ehkä tarvitsekaan muuttaa Euroviisuihin – näin Yle perustelee (yle.fi)
– Windows95man villitsi yleisön ja bailasi tiensä UMK:n voittoon – näin pisteet jakautuivat (yle.fi)
– Yleisöäänet ratkaisivat UMK-finaalin: tässä on Suomen Euroviisuedustaja (www.is.fi)
Kove: Gerd Altmann (Pixabay)