Saksa virgeomâhááh finnejii ovdil juovlâi tiäđuid máhđulii volliittemaigust Köln tuámukiirkon. Saksalâš Tagesschau-lostâ čáálá, et Saksa torvolâšvuotâvirgeomâhááh ožžuu mottoom peivi ovdil juovlâááptu epimiärálii tiäđu, mon mield Köln tuámukirkko ličij máhđulâš volliittemčuosâttâh uđđâvuođááptu.
Pegâlmâs tuámukirho torvotooimah čavgejuvvojii tállân uhke keežild. Lávvárduv rääjist puoh kiirkon viggeeh tärhistuvvojii siisâpuáttim ohtâvuođâst. Peivikyesih já juovlâááptu meesun puátteeh finnejii ravvuu leđe väldihánnáá laavhâid fáárun, já sij avžuuttuvvojii puáttiđ puorijn aigijn pääihi oolâ. Nube juovlâpeeivi rääjist turistij uápásmum kiirkon ij lah tuáistáážân ollágin máhđulâš.
Köln poolis tuuđhâi várutoimân tuámukirho jo lávvárduv vuástásii iijâ. Pooliseh uccii pávkkánâsâid eereeb iärrás pennuigijn.
Saksalâšmedia mield Saarland uásistaatâst lii ohtâ olmooš valdum kiddâ. Taat almai lii tobdos radikalisijn jurduin. Meiddei Nuorttâriijkâst Wienist láá maaŋgâs valdum kiddâ.
Bild-lostâ já uđâstoimâttâs DPA mainâšává meid Wien Pase Tiäppán katedraal máhđulâžžân volliittemčuosâttâhhân. Nuorttâriijkâ poolis mield uhketääsi lii aaleeb ko ovdil, já tondiet torvotooimah čavgejuvvojeh.
Ranskaast váldojii vittâ ulmuu kiddâ terrorismtutkâmij ohtâvuođâst. Le Parisien -aavis muštâlij pooliskäldee vuáđuld, et taah ulmuuh lijjii valmâštâlmin terrortavo Nancy juovlâmarkkânijn.
Poolis kiddee eromâš huámášume kirhoid, oskoldâhlijd čokkânmijd já juovlâmarkkânáid.
Käldeeh:
– Massive Sicherheits-Checks am Kölner Dom (www.bild.de)
– Erhöhte Wachsamkeit nach Anschlagsfurcht in Köln und Wien (www.sueddeutsche.de)
– Gottesdienst unter erhöhtem Schutz (www.tagesschau.de)
– Extra veiligheidsmaatregelen Dom van Keulen na aanwijzing over mogelijke aanslag (nos.nl)
– Vijf arrestaties in Frankrijk in onderzoek naar terrorisme (nos.nl)
Kove: Michael Philipp (Pixabay)