Lontoo poolis lii moonnâm vástuppeeivi váldám kiddâ almaa kátutaiđâr Banksy taaiđâpitá suáládem keežild. Koččâmuš lii viehâ vissásávt almast, kiäm lappâdjotteeh kovvejii videokován já valdii sust čuovâkuuvijd suáládem ääigi. Detaljeh iä lah almottum, pic tutkâm juátkoo.
Taaiđâpittá almostittui Lontoost Southwark kaavpuguásist. Tot lâi pieijum STOP-orostemmeerhâ uássin: jotolâhmeerkân lijjii lasettum kulmâ suáldátkirdemmaašin. Tiijme siste meerhâ almostitmist tot jo suáládui.
Maaŋgah pääihi oolâ sattum ulmuuh filmájii já kovvejii taiđuu suáládem. Kuohtuuh almaah lává čielgâsávt uáinusist kuuvijn.
Tuođâšteijee muštâlij Sky News -loostân, et suolâ kuárŋui pyerá oolâ siämmást ko nubbe almai tollij pyerást kiddâ. Suolâ iiskâi luovviđ jotolâhmeerhâ. Ko tot ij luhostum, sun vuolgij meddâl já poođij mottoom miinut keččin maassâd sruuvâskerreigijn. Tastoo jotolâhmerkkâ luovânij. Ton maŋa suolâ kaččâlij merháin patârâsân. Sun kuođij sruuvâskerreid meerhâ paaldân. Lii epičielgâs, lâi-uv pyerá tuállejeijee suu iše vâi tuše mottoom lappâdjottee.
Kaavpuguási tieđetteijee eeđâi, et kaavpug haalijd jotolâhmeerhâ maassâd, nuuvt et puoh ässeeh pyehtih navdâšiđ Banksy eromâš taiđust.
Banksy lii tobdos brittilâš taaiđâr, mut eromâš lii tot, et suu identiteet ij lah almolávt tiäđust. Suu pargoin lii távjá miinii pooliitlijd saavâid. Taat merkkâ hiäŋgái kátunommâkoolbâ Commercial Way peht. Taat saje lii tulkkum toin naalijn, et taaiđâ lii uáivildum viärjukäävpi vuástálistmân.
Banksy taaiđâ lii ovdil-uv suáládum. Galleriatuállee eeđâi BBC:n, et čuorvâkäävpist tággáár taaiđâ mávsáččij 290 000–575 000 eurod, mut tääl ličij väädis kavnâđ uástee tondiet ko taaiđâpittá lii suáládum.
Käldeeh:
– Verdachte opgepakt voor razendsnelle diefstal Banksy-kunstwerk (nos.nl)
– Banksy: Police investigate removal of street sign in Peckham as alleged theft (www.bbc.com)
– Banksy: Police arrest man on suspicion of theft and criminal damage after artwork removed within minutes of artist confirming authenticity (news.sky.com)
Kove: michaelv195 (Pixabay)