Juovlâááptu koskâpeeivi ääigi Suomân lii kulluuttum juovlâráávhu. Taat juovlâärbi tábáhtuvá jyehi ive Tuurkust Brinkkala táálu luptâstuvâst. Taan ive Tuurku kaavpug protokollahovdâ Mika Akkanen luuvâi juovlâráávhu kulluuttâs. Taat lii sunjin jo ohtnubálovváád kerdi, ko sun kullut juovlâráávhu.
Juovlâráávhu kulluuttem aalgij Tuurkust jo 1600-lovvoost, mut kulluuttâs tekstâ lii mulsâšum. Taat tekstâ, mii tääl lohhoo, lii čallum pajas Tuurku pyelimist 1827 tuššâm kulluuttâs vuáđuld. Ruotâkielâlâš kulluuttâs lii siäilum siämmájin säänist sáánán, mut suomâkielâlâš kulluuttâs lii tivostistum 1800-lovvoost, tastko ruotâkielâlii nootaar jurgâlem suomâkielâlâš versio lâi ”mottoom muudon suámálâš”, muštâl Mika Akkanen Ilta-Sanomat-loostân.
Kulluuttâs lii čallum vyesičevđipergamentân, mii lii ivveest 1956, ko seremonia koolgâi šoddâđ eromâš juhlálâžžân. Pergament váldoo olgos tuše juovlâi ääigi, já mudoi tot siäiluttuvvoo Tuurku kaavpug kassaskaapist. Ovdil ive 1956 kulluuttâs luhhui veikâ maggaar pápárist.
Juovlâráávhu kulluuttem lii puoh enâmustáá keččum televisiovuolgâttâs juovlâi ääigi, já toin naalijn Akkasii säänih kullojeh paaihijn pirrâ Suomâ.
Juovlâráávhu kullutmist lii ain väriolmooš fáárust, jis juovlâráávhu kulluutteijei sáttoo miinii. Juovlah puátih ain jyehi ive.
Meid Anarâš aavis tuáivut lohheidis puorijd juovlâid já luholii uđđâ ive 2024.
Käldeeh:
– Suomen Turku julisti joulurauhan ennätysyleisölle – jopa yli 18 000 henkeä seurasi paikan päällä (yle.fi)
– Suomi hiljentyi joulunviettoon Turun joulurauhan julistuksen myötä (www.is.fi)
Kove: Jill Wellington (Pixabay)