Pariisi kesiolympialiih tuállojeh syeinimáánu 26. peeivist porgemáánu 11. piäiván 2024. Uđđâ šlaaijân váldoo fáárun breikkam ađai breaking.
Vuáládâhenâmij njunošvälmejeijee Tyrone van der Meer čielgee NOS-uđđâsáid, et breikkam lii siämmást sehe taaiđâ já valastâllâm. Sun ij lijjii kuássin oskođ, et breikkaamist motomin šadda olympiakištoi šlaajâ.
Breikkam ađai breikkitánssám šoodâi pivnohin Ovtâstum staatâin 1990-lovvoost, já tot lii taiđuu, taansâ já muusik siävuttâs. Šlaajâ lii finnim vaiguttâsâid hiphopist. Tánssájeijee paaldâst tiskâjukká suáittá muusik, mon breikkajeijee kalga kevttiđ ävkkin jieijâs lihâstuvâin.
Tuámmár Maikel Walker čielgee NOS-uđđâsáid, et kištottâlleeh iä tieđe muuneeld, maggaar muusik sij finnejeh kiišton, ađai sij kalgeh pasteđ improvisistiđ. Sun muštâl, et tuámáreh kiddejeh enâmustáá huámášume kreativiteetân, musikaallâšvuotân, originaliteetân já oovdânpyehtimân.
Uđđâ šlaajâ stuárráámus hástun lii taan muddoost čuággái jyehim: šlaajâ taarbâš taggaar árvuštâllâmciäkkáduv, et tot ij vääldi meddâl artist taiđâlii rijjâvuođâ, mon keežild oovdânpyehtim šadda nuuvt eromâšin.
Breikkamkištoh uárnejuvvojeh olympialijn Place de la Concordest porgemáánu 9.–10. peeivi. Tuše neeljis per eennâmuási pyehtih uásálistiđ kiišton.
Euroop ohtân ovdâsteijen lii vuáládâheennâmlâš Menno van Gorp, kote lii vuáittám BC One World -fiinaal kulmii. Sun muštâl NOS-vuolgâttâsâst, et olympialiih lekkih maaŋgâid uuvsâid ubâ šlaajân. Suu mielâst lii eromâš iskâđ, maht te šlaajâ luhostuvá olympialijn. Sun povvâst, et Pariisist sun áigu kištottâllâđ kollemitalist, já arvâlusâi mield sun lii-uv kievrâ vyeitteeiävtukkâs breikkitánssáámist.
Käldeeh:
– Paris Games: 4 new sports to discover in 2024 (www.france.fr)
– IOC Session votes for Breaking’s inclusion at Paris 2024 (www.france.fr)
Kove: DaveMeier (Pixabay)