Suomâ juátká raijiittâsâid nuorttârääji alne. Räjijotteemsajeh pisoh kiddâ väldihánnáá lohon Vaalimaa já Niirala räjijotteemsoojijd, moh liäkkojeh jotolâhân tuorâstuv 14.12. Haldâttâh piäjá raajijd uđđâsist kiddâ, jis patâreijei puáttim nuorttârääji alne juátkoo.
Staatârääđi meridij ääšist paijeelmiärálii čokkânmist 12.12. Uđđâ miärádâs lii vyeimist 14.1.2024 räi.
– Nubástusâid pyereeb kuávlun ij pyevti uáiniđ mudoi ko ložžiimáin raijiittâsâid. Tondiet mij lekkâp tääl kyehti räjijotteemsaje, já siämmást mij lep valmâšeh uđđâ raijiittâssáid. Suomâ ana huolâ aalmuglii torvolâšvuođâstis, tiädut njunošminister Petteri Orpo.
Suomâ já Ruošâ eennâmrääji alne rääji rastalditteeh kalgeh kevttiđ Vaalimaa já Niirala räjijotteemsoojijd. Täävvirjotolâh Vainikkala peht juátkoo.
Nuorttârääji alne almugijkoskâsii suojâlem puáhtá uuccâđ tuše Vaalimaa já Niirala räjijotteemsoojijn.
– Tast huolâhánnáá mij halijdep tiäduttiđ, et taan tiileest Suomâ já Ruošâ koskâsii rääji oolâ ij kannat vyelgiđ. Suomâ ana huolâ tast, et mii nuorttârääjist ij šoodâ uđđâ enâmânpuáttimkiäinu patâreijeid Euroopân, tiädut sisminister Mari Rantanen.
Virgeomâhâsâi mield uhke ij lah vala lappâd. Lii oskottettee, et Ruošâ peln láá vala ennuv máhđuliih enâmânpuátteeh. Ruošâ virgeomâhâsâin lii ain máhđulâšvuotâ vuolgâttiđ patâreijeid Suomân.
Haldâttâh já virgeomâhâsah čuávuh nuorttârääji tile tárkká.
Käldee:
– Suomi jatkaa rajoituksia itärajalla tilanteen hallitsemiseksi − hallituksella valmius uusiin tiukennuksiin (intermin.fi)
Kove: Pexels from Pixabay