Majemuš-uv áávus leijee Suomâ já Ruošâ koskâsâš eennâmräjisajattâh, Räji-Joovsep, kiddejuvvoo koskoho já tuorâstuv koskâsii iijâ tijme 00:00. Ton maŋa maggaargin persovnjotolâh ij lah máhđulâš rääji rasta kyevti ookon. Kiddim lii masaba tievâslâš, já tot pištá juovlâmáánu 13. peeivi räi. Tuše Vainikkala sajattuv peht joteh rääji rasta motomeh täävvirjunáh.
– Koččâmuš lii Ruošâ vaiguttemtooimâin, já tom mij ep tuhhit, njunošminister Petter Orpo tiädut.
Riehtikanslervirgádâh tuhhiittij tom, et rääji puáhtá kiddiđ ollásávt meriááigán.
Almugijkoskâsii suojâlem occeeh lassaanškuottii ohhoost 44. Ohhoost 45 Suomân pottii 32 olmožid, já ohhoost 46 rääji rasta juttii jo 527 patâreijed. Ohhoost 47 rääji rasta läiđejii tuolmâmpyerás 341 olmožid. Haldâttâh vuáđuštâl, et puáttei meeri nuorttârääji peht tágárij olmoošmerijgijn ličij nyevt 10 000–20 000 torvopääihi occed jyehi ive.
Olgoministeriö almoot rajij kiddiimist tállân diplomaattääsist Ruošâ federaation.
Aagah rääji kiddiimân šodâškuottii, ko haldâttâh finnij virgeomâháin uđđâ tiäđuštâllâmtiäđuid. Ruošâeennâm mieđeet ulmuid viisumijd enâmân puátimân, vâi sij pyehtih mađhâšiđ Afrikist Ruošâenâmân, já tobbeen vist FSB stivree puátteid viisumttáá Suomâ vuástásii rääji oolâ.
Koččâmuš ij lah olmâ eeđeest. Tast muštâl meid tot, mon älkkeht puátteeh kavnii kiäinus kukkenorroo Räji-Joovsep räjisajattâhân, Orpo čielgee.
Orpo váátá Ruošâeennâm lopâttiđ operaatios.
– Tievâslâš kiddim lii velttidmáttum. Ruošâeennâm lii tovâttâm tile, já tot puáhtá tom meid lopâttiđ, Orpo tiädut.
Käldeeh:
– Koko Suomen itäraja suljetaan (valtioneuvosto.fi)
– Itäraja menee kiinni – Päätös on historiallinen (www.iltalehti.fi)
Kove: Marja-Liisa Olthuis