Lidl-kävppikonsern tiäđáttâsâst muštâluvvoo, et Lidl ij innig vyebdi kirdemrahtin puohtum heđâlmijd já ruonnâsijd. Lidl lii viggâm lopâttiđ kirdemkuuljâtmijd jo kuhháá, mut majemui ivij Suomân láá puohtum ááimu peht vala motomeh seesoongtävireh tego stágguparsa já miestâsareh. Tääl Lidl lii vuosmužžân kävppikonsernin meridâm luoppâđ áimujotoluvváin puohtum heđâlmij já ruonnâsij vyebdimist. Tágáráin linjáámáin šiäštojeh jyehi ive suullân pel miljovn kiillud CO2-luáštuh, mii västid vááijuv 50 syemmilii jyehi-ihásijd luáštuid.
Tullilágádâs statistiik mield ive 2022 purrâmušveerki uási Suomân áimujotoluvváin puohtum tävirijn lâi 1,4 %. Tävirij jođettem uási ubâlâš luáštuin lâi kuittâg ucce: suullân 5–7 %.
– Heđâlmij já ruonnâsij pyehtim kirdemmašináin nube peln eennâmpáálu ij lah moingin naalijn ekologisâš. Tävirij čiđđâluodâ ucedem tiet lâi meid luándulâš luoppâđ heđâlmij já ruonnâsij pyehtimist kirdemmašináin, čielgee Lidl ovdâsvástádâshovdâ Laura Kvissberg.
Heđâlmeh já ruonnâseh puáhtojeh kirdemmašináin Suomân eres eennâmoosijn, vâi taid finniiččij kavppijd nuuvt jotelávt já vorâsin ko máhđulâš. Ovdâmerkkân stágguparsa lii puohtum kiđđuv Suomân Maadâ-Amerikist ovdilgo eurooplâš valje lii laddâm.
– Mij halijdep puátteevuođâst-uv faallâđ jieččân äššigâššáid vorâs heđâlmijd já ruonnâsijd, mut toin naalijn, et taid ij taarbâš jođettiđ kirdemmašináin. Stágguparsa finnee tállân ko eurooplâš seesoong álgá, já eres kukkeláá puohtum heđâlmeh vist puáhtojeh tamppáin – ovdâmerkkân avokadoh iä kuássin puohtuu kirdemmašináin, Kvissberg muštâl.
Lidl lii ovdâsvástádâsohjelmstis čonnâsâm ucediđ luáštuid. Päikkieennâm joođeetmij uásild ulmen lii, et kävppijoođeetmijn 20 % tahhojeh eresnáál ko fossiilpuáldámuššáin ovdil ive 2025. Lidl kuljâttemkiäinuin vyejih tääl käävci biokaasurekkad, mon lasseen luáštui ucceedmân viggoo eereeb iärrás jođettemkiäinui suunâttâlmáin já pehtilis jođettemkapasiteetáin.
Käldee:
– Tiesitkö, että Suomeen lennätetään ruokaa? Lidl linjasi toisin (www.epressi.com)
Kove: Nadin Dunnigan (Pixabay)