President Martti Ahtisaari hävdidmeh uárnejuvvojeh Helsigist Maarti peeivi vástuppeeivi skammâmáánu 10. peeivi. President Ahtisaari sivnedemtilálâšvuotâ tuálloo Helsig tuámukirhoost tijme 13.
President Ahtisaari hävdiduvvoo Hietaniemi hävdienâmân sajan, kost láá meid ovdebái presidentij Urho Kekkosii, Mauno Koivisto já Risto Ryti häävdih. Hävdidempeivi lii almolâš lippupeivi ubâ enâmist. Yleisradio vuolgât hävdidmijd njuolgâ vuolgâttâssân Yle TV1:st já Yle Areenast já meid Radio Suomist.
Staatârääđi meridij almosčuákkimstis koskoho 18.10. staatâhävdidmij orniimist. Staatârääđi jesâneh tollii vistig joskis puudâ vuossaargâ 16.10. jáámmám president mušton.
Staatâhävdidmeh uárnejuvvojeh uđđâ njuolgâdusâi mield tuše presidentáid. Spiekâstuvah láá kuittâg lamaš motomeh. Staatârääđi puáhtá meridiđ staatâhävdidmijd meiddei kuhesáigásâš njunošministeráid, ovdâskode sahâalmaid já ulmuid, kiäin lii lamaš eromâš aalmuglâš merhâšume, tego Nobel-palhâšume uážžoid. Tááláš vyehi lii lamaš vyeimist ive 1989 loopâ rääjist.
Staatârääđi asâttij toimâkode Martti Ahtisaari hävdidmij vuáváámân já valmâštâlmân. Toimâkode saavâjođetteijen tuáimá staatâčällee Risto Artjoki. Ahtisaari omâhái ovdâsteijen tuáimá president Ahtisaari kandâ Marko Ahtisaari.
Martti Ahtisaari lâi Suomâ lovváád täsivääldi president. Sun tooimâi virgeest ivij 1994–2000. Sun lâi 86-ihásâš.
Käldeeh:
– Presidentti Martti Ahtisaaren valtiolliset hautajaiset järjestetään Helsingissä Martin päivänä 10.11. (valtioneuvosto.fi)
– Valtiolliset hautajaiset (vnk.fi)
Kove: Johannes Jansson/norden.org (Wikimedia Commons)