Yle mield puáttee ive budjetarvâlusâst haldâttâh lii meridâm lopâttiđ Suomâ-Ruoššâ-seervi ruttâdem. Tieđâ- já kulttuurminister Sari Multala muštâlij ääšist ovdâskode tievâsčuákkimist, mast kieđâvuššoo staatâ budjetarvâlus puáttee ihán.
– Mij nubástittep ustevservij ruttâdem uuccâmkriterijd toin naalijn, et Suomâ-Ruoššâ-seervi ruttâdem nohá puáttee ive puohrâkkân, Multala muštâl.
Taan ive Suomâ-Ruoššâ-servi finnij máttááttâs- já kulttuurministeriöst torjuu vuáđutoimáid 480 000 eurod. Toorjâ lâi jo čuuvtij ucceeb ko ovdebái ivij. Ive 2022 servi finnij nyevt 826 000 eurod.
Aalmugovdâsteijee Timo Heinosii mield seervi finnim toorjâ lii lamaš masaba kuálmádâs puoh máttááttâs- já kulttuurministeriö ustevservijd mieđettem torjust, ige tot tááláá tiileest oro innig kuáhtulâžžân.
Suomâ–Ruoššâ-servi lii sundedâm tooimâs uđđâsist, já tot lii nomâttâm taan ive tehelumos toimâidis rasismvuástálii pargo, äigikyevdilis tiäđu pyevtittem Ruošâst já ton aalmuglâšohtsâškoddeest, kulttuurohtsâšpargo Euroopân patârâm ryeššilijgijn já ukrainalijgijn sehe kontaktij paijeentoollâm suáđivuástásâš tuáimeigijn.
Ovdâmerkkân Talouselämä-lostâ lii huámmášuttâm, et siämmáá ääigi ko Suomâ-Ruoššâ-servi finnij pele miljovn eurod, te ukrainalij servi finnij 80 000 eurod. Ohtsis ministeriö juovij torjuid ustevservijd nyevt 1,7 miljovn eurod. Nubben enâmustáá torjuu finnij Talouselämä mield Tuglas-servi, mii lii Suomâ puárásumos já stuárráámus Viro-servi: tot finnij 280 000 eurod.
Suomâ–Ruoššâ-seervi vt. toimâjođetteijee Riku Savosii mield taat almottâs lâi olâttâs:
– Tot lii eromâš merhâšittee já olâttittee uuđâs, mast iä lah oinum magarehkin meerhah. Ministeriö lii taan räi tuárjum mii já lamaš tutâvâš linjánubástussáid, maid mij lep porgâm, Savonen iätá.
Suu mielâst tiäđáttâsâst lii mottoommuđusâš puástuibárdâs seervi tááláá roolist.
– Misthân ij lah Ruoššáin maggaargin virgálâš ohtsâšpargo ige ärbivuáválâš ustevtoimâgin, moos tiäđáttâsâst čujottuvvoo. Aaibâs tego miinii tiäđuid váiluččij ministeriöst.
Savonen meid tiädut tom, et jis taat toimâ nohá, te mii te puáđáččij ton sajan.
Ministeriö ruttâdemuási lii Savosii mield tääl suullân 60–70 prosentid Suomâ–Ruoššâ-seervi budjetist. Ovdebái čuoppâmij puáđusin pargeemeeri lii koččâm paijeel lovveest neelji pargei.
Käldeeh:
– Suomi–Venäjä-seura menettää 486 000 euron rahoituksensa – Järjestö puolustautuu: ”Jos meitä ei ole, mitä tulee tilalle?” (yle.fi)
– Suomi-Venäjä-seura saa lähes puoli miljoonaa euroa veronmaksajien tukea (www.talouselama.fi)
Kove: Fabrizio Brecciaroli