Täsivääldi president kanslia tieđeet, et Martti Ahtisaari lii jáámmám. Ahtisaari jaamij 16.10.2023 tijme 6:40 Helsigist. Sun lâi 86-ihásâš. Sust paasij leskâ Eeva já kandâ Marko.
Martti Oiva Kalevi Ahtisaari tooimâi täsivääldi presidentin ivij 1994–2000. Sun lâi Suomâ lovváád president. Ovdil presidentpaijees sun tooimâi maaŋgâin merhâšittee tooimâin Suomâ olgoministeriöst já Ovtâstum aalmugkuudijn.
Presidentpaijees maŋa Ahtisaari vuáđudij áárvustoonnum ráávhurähtimornijdume CMI – Martti Ahtisaari Peace Foundation já tooimâi almugijkoskâsijn ráávhurähtim- já sovâttâllâmpargoin. Tubdâstussân kuhesáigásii pargostis ráávhu oovdân president Ahtisaarin mieđettui Nobel-ráávhupalhâšume ive 2008.
”Mij tubdâp stuorrâ soro, ko lep váldám vuástá tiäđu president Martti Ahtisaari jämimist. Martti Ahtisaari oskoi ulmui, čuovviittâsân já pyerivuotân, já sun eelij stuorrâ, merhâšittee eellim. Sun lâi nubástusaigij president, kote jođettij Suomâ gloobaallii EU-ääigi kulij”, täsivääldi president Sauli Niinistö iätá.
President Niinistö sáárnui president Martti Ahtisaari jäämmim keežild Yle TV1:st 16.10.2023 tijme 11.
President Martti Ahtisaari sorokirje lii áávus Presidentlanneest roovvâdmáánu 17. peeivi 2023 klo 10 rääjist. Aalmugässeeh já ovtâstumeh pyehtih čäälliđ kiirján sorosanijdis vástuppeeivi, roovvâdmáánu 20. peeivi, räi. Sorokirje čáálá vuosmužžân vuálá täsivääldi president Sauli Niinistö.
Sorokirje lii áávus Presidentlanneest Mariankatu pele aulaast čuávuvávt: majebaargâ tijme 10–15, koskoho tijme 10–15, tuorâstuv tijme 10–18 já vástuppeeivi tijme 10–15. Čujottâs lii Mariankatu 2 (lasâuuvsah).
Omâháid čujottum sorosaanijd puáhtá pyehtiđ oovdân meid viermist. Viermist leijee sorokirje lii áávus majebaargâ, roovvâdmáánu 17. peeivi, tijme 10 rääjist. Sorosäänih čuákkejuvvojeh já teddiluvvojeh maŋeláá kirjen, mii luovâttuvvoo president Ahtisaari omâháid oovtâst Presidentlanneest ávusin lamaš sorokirjijn.
CMI – Martti Ahtisaari Peace Foundationin ávus muštosijđo president Ahtisaarist lii lekkum.
Käldeeh:
– Presidentti Martti Ahtisaari 1937–2023. Täsivääldi President kanslia tiäđáttâs 36 / 2023. (www.presidentti.fi)
– Presidentti Ahtisaaren surukirja avataan tiistaina. Täsivääldi President kanslia tiäđáttâs 37 / 2023. (www.presidentti.fi)
Kove: Johannes Jansson/norden.org (Wikimedia Commons)