Tave-Euroopân moonnâm oho aalgâst puáttám Hans-stormâ tovâttij vahâgijd enâmustáá Taažâst já Ruotâst. Ovdebái ennustâsâi mield stoormâ korrâsumos muddo ličij juksâm meid Suomân, mut luhhoost návt ij kuittâg keevvâm.
Stormâ já toos kullum korrâ arve já pieggâ tovâttii ovdâmerkkân tuulvijd já eennâmvierâmijd pirrâ Taažâ já Ruotâ. Taažâst Vang kieldâst arvemeeri lâi oovtâ pirrâmpeeivi ääigi joba aldasáid 90 millimeetterid. Ovdâmerkkân Avelist ubâ porgemáánu arvemeeri lii koskâmiärálávt 75 millimeetterid. Göteborgist Göta-juuhâ tuulvâi nuuvt ennuv, ete kaavpug kaartâi joskâd čääsi väldim juuvâst. Tast ličij šoddâm taggaar riskâ, et kieđâvušmettum tuolvâčääsi ličij kulgâm juuhân. Meid kaavpug čoođâ mannee Euroopmaađij 6 ferttij pieijâđ kiddâ stuorrâ čäcimeerij tiet algâohhoost. Viestâr-Ruotâst Årest arve tovâttij eennâmvierâmijd, moi tiet maađijeh, ryevdirađe já motomij táálui vuáđudâsah vahaduvvii. Hudiksvall kieldâst mottoom juná, mii lâi maađhâšmin Tukholmast Sundsvallân, skirvânij meddâl raađeest, ko ryevdirađe vyelni leijee peŋkkâ viirâi korrâ arve tiet. Motomij kuávluin Taažâst maaŋgâs karttii evakuistuđ eennâmvierâmij já tuulvij tiet, já motomáid sijdáid ij ubâ peessâm ollágin, tastko pajanâm čäsuáivi eestij puoh luodâi kevttim.
Meteorologeh ennustii porgemáánu aalgâst, ete stormâ ličij puáttám korrâsávt meid Suomân, mut loppâloopâst tot lâi čuuvtij keppisub ko Taažâst já Ruotâst. Suomâst Sylvian kočodum stormâ tovâttij kuittâg mottoom verd vahâgijd, veik toh paccii viehâ keppisin, jis verdid naaburenâmáid já toos, magareh toh liččii puáhtám leđe. Čuolmâid tovâttii iänááš muorah, moh lijjii viirrâm luodâi já šleđgâlinjái oolâ korrâ piegâ tiet. Loveh tuhátteh tááluh paccii šleđgâttáá Maadâ-Suomâst já Pohjanmaast. Helsigist lâi meid tárguttâs leđe Depeche Mode -muusikjuávhu konsert majebaargâ 8. peeivi, mut stoormâ tiet tom ij puáhtám orniđ, ige ton sajan lah puátimin uđđâ konsert.
Käldeeh:
– Myrskyn rajuimmat vaikutukset jäivät Norjaan ja Ruotsiin (yle.fi)
– Götajoki tulvi satamaan, Åressa vajoaa maa ja teitä sortuu: ”En ole koskaan nähnyt mitään tällaista” (www.hs.fi)
– Kuvat: Hans-myrsky on riehunut Norjassa – tällaista tuhoa se aiheutti (www.is.fi)
– Juna suistui raiteilta myrskyn vuoksi Ruotsissa (www.iltalehti.fi)
Kove: Gianluca (Pixabay)