Vástuppeeivi 21.7. älgih Aanaar-ohoh, moi ääigi uárnejuvvojeh maaŋgâmuáđusiih tábáhtusah pirrâ kieldâ. Aanaar-ohoh pišteh love peivid 21.7.–30.7. Aanaar kieldâ, kuávlu irâtteijeeh, seervih já páiháliih ässeeh uárnejeh paijeel čyeti tábáhtussâd pirrâ kieldâ Suáluičielgist Čevetjáávrán.
Aanaar-ohoh älgih vástuppeeivi, ko Aanaar kieldâ teknisâš toimâ uárnee syeinitalgoid Avelist, škovlâ- já kulttuurkuávdáš Kaarre alda. Enâdâhpiäldust lii tárguttâs nijtteđ já čuággiđ suoinijd seibháid sehe navdâšiđ talgookäähvist olgon. Tegu eres-uv olgotábáhtussáid, syeinitalgoid lii šoŋŋâvárádâs. Arvepeeivi várás lii kuittâg valjeest ohjelm meid sissoojij: jooga, sävni, tanssâkurssâ, konserteh, čáitálduvah, elleekoveh, tyejimarkkâneh já joba dartsleirâ nuoráid. Ovdâmerkkân meccijooga, tuolmâmpyerá mokkemätki já emoji sundedem láá ohjelmist, veikkâ arvaččij.
Fáállun láá meiddei kátupurrâmâš, kesibrunssi, ohtâsâš tyejipuddâ, sijdâbingo, muštâččemeehid já kulttuurpirâspeivi.
Sijdáid kesipeeivih
Sijdâtábáhtusah já olgokonserteh láá hammim nanos ruŋgo Aanaar-ohoi tábáhtusubâlâšvuotân jo ive 2009 rääjist. Kesipeeivih viättojeh taan keesi ovdâmerkkân Čevetjäävrist, Njellimist, Kuáppilist, Rivdulist já Avelist Aurora Village šiljo pirrâduvâst. Ton lasseen Lemmest láá kollekištoh sehe Lemmin Tähti -karaokekišto já -taansah. Kaamasist lii ubâ perruu kesipeivi, já Anarist sijdâseervi suámsurtori.
Luándu- já olgotábáhtusah
Uđđâ luándu- já olgotábáhtusah Aanaar-ohoin láá ovdâmerkkân Kesipeivi-tábáhtus Siggávuonâst, Tuurupuolžâ luándupálgá stivrim mokkemätki Kaamasist, Lapland O Week -sundástemtábáhtus Suáluičielgist já Puolivilli 2023 -olgoáimukonsert Suáluičielgi Aurora-tuuveest. Pennui Hop Lop -tábáhtus já huskypeenuvkäärdist kolliistâllâm fállojeh hävskis homáh ellei usteváid.
Elleekoveh
Elleekoveh čáittojeh taan ive škovlâ- já kulttuurkuávdáš Kaarre uđđâ elleekoveteatterist. Ohjelmist láá om. uđđâ Indiana Jones -elleekove, Mission Impossible, Barbie já animaatio elleekove Elemental.
Makkuuttâs jyehi smaakân
Aanaar-ohoi lekkâmkonsert uárnejuvvoo vástuppeeivi Avveel škovlâ- já kulttuurkuávdáš Kaarrest, já siämmáá peeivi älgih meiddei Avveel pelimannipeeivih. Lase makkuuttâs lii tiäđust, ko Cafe Avelist lii Johanna karaoke 22.7. já 29.7. The Bilebändi láávdást 28.7. Hooteel Avelist, já Nááváárnjaargâst lii Takaisin Ivaloon -festivaal 28.–29.7., kost luáván pajaneh ovdiih já táálááh avveelliih bändih.
Urho Kekkos aalmuglâšmecci já Suomâ tavemus jieŋâskiärruservi Tunturi-Kiekko juhloh 40-ihásii já Watercross 30-ihásii myeđhi Aanaar-ohoin.
Info
Aanaar-ohoi Info lii kulttuursaje Kuulas viäskárist, já tot lii áávus argâpeeivij tme 13–17. Ohjelmlostâ lii meiddei Inarilainen-páihálâšloostâ kooskâst taan ohhoost. Tot kávnoo meiddei kirjeráájust. Nettisiijđost inariviikot.fi/tapahtumakalenteri lii ubâ ohjelm suomâkielân, eŋgâlâskielân, tavesämikielân, anarâškielân já nuorttâlâškielân.
Sonja Valle
Käldee:
– Tervetuloa Inariviikoille 2023! (www.inariviikot.fi)
Kove: Sonja Valle