Espanja algâttij historjás viiđâd EU-saavâjođetteijeevuođâ äigipaajees syeinimáánu aalgâst. Taat saavâjođetteijeevuotâ pištá ain ihepele. Espanja arbij saje Ruotâst, mii tooimâi saavâjođetteijen uđđivemáánust kesimáánun 2023. Espanja maŋa saavâjođetteijeevuotâ sirdoo Belgian čuávuváá ihepiälán uđđivemáánu 2024 aalgâst.
Espanja tiädut saavâjođetteijeevuođâs ääigi nelji válduääši: uđđâsistráhtálistem já strategisii autonomia, ruánáá já ekologisii sirdâšume, sosiaallii já ekonomisii vuoigâlâšvuođâ já EU ohtâlâsvuođâ nonnim.
Uđđâsistráhtálistmist já strategisii autonomia nonniimist Espanja haalijd nonniđ EU kištottâllâmhiäđu maaŋgâ syergist tego uđâsmuvvee energia, digitalisistem, robotiik já talhâsráhtálâšvuođâ suorgijn. Ruánáá já ekologisii sirdum syergist Espanja haalijd ovdediđ loopâ räi majemuid laavâid siämmáánáál ko meid Fit for 55 -šoŋŋâdâhpakkeet laavâid. Ton lasseen tot tiädut meiddei Ovtâstum aalmugkudij ovdedem ulmij njunoščuákkim já ive 2030 Agenda čuákkim. Sosiaallii já ekonomisii vuoigâlâšvuođâ oovdân Espanja áigu ovdediđ irâttâsviäruttâs minimistandardij finnim puoh jeessânstaatâin, eromâšávt digitaallii syergist sehe estiđ vuáimálubbooht viärukarvem EU:st. Niäljádin tot viggá ovtâstittiđ EU sismarkkânijd nuuvt paŋkkiunion já uáiviomâdâhmarkkânunion sesâlistmáin, iäláskittemvarij pehtilis kiävttoin ko meid siisâvarrim- já torvosajeuđâsmittem čoođâtuálvumáin.
Espanja saavâjođetteijeevuođâ ohtâ kuávdáš prioriteet lii meid Ukraina tuárjum, mondiet uáiviminister Pedro Sánchez algâttij saavâjođetteijeevuođâ äigipaje kolliistâlmáin Kiovast.
Käldee:
– Espanja aloitti EU-puheenjohtajakautensa 1. heinäkuuta (www.sirpapietikainen.net)
Kove: Vane Monte (Pixabay)