Anarâškielâ servi já Ummeesämikielâ servi algâttii ohtsii proojeekt 1.9.2025. Proojeekt nommâ lii ”Online tools for Inari Saami and Ume Saami language learning” ađai ”Nettipiergâseh anarâškielâ já ummeesämikielâ oppâmân”. Proojeekt ulmen lii rähtiđ uđđâ nettipiergâsijd já jieškote-uvlágánijd oppâmateriaalijd anarâškielâ já ummeesämikielâ várás. Proojeekt pištá kulmâ ive.
Uđđâ piergâseh láá jo neetist. Toh láá kuittâg vala koskân, já tondiet toh iä vala lah puohâi kevttimnáál. Piergâsij ohtsâš nommâ lii ”Samionary”. Tot ovtâstit häävskiht sämikielâ já sääni ”dictionary” ađai ”sänikirje”. Noomâ lasseen lii tääl meiddei logo, mast uáinojeh puustav S, poccuučuárvih já ávus sänikirje. S‑pustavist láá sämi-ivneh.
Anarâškielâ piergâs máttá sujâttiđ anarâškielâ saanijd puoh máhđulijn haamijn. Sujâttum haamijn láá ain fáárust kukkodâhmeerhah. Ko ocá mottoom sääni, te piergâs addel ton vuáđutiäđuid já vuáđuparadigma sehe liiŋkâid omâstem- já diminutiivparadigmaid.
Interreg Aurora ‑ruttâdemohjelm njuolgâdusâi mield proojeekt lii juohhum kuuđâ raportistempajan. Jyehi raportistempaje pištá kuttâ mánuppaje. Ulmen lii finniđ puoh sujâttemopâlijd pargoid valmâšin ovdil nube raportistempaje loopâ. Toin naalijn proojeekt majemui kyevti ive ääigi puáhtá vuáijuđ sänikirjepargoid já oppâmmateriaalij čälimân.
Proojeekt válduruttâdeijee lii Euroop union. Eres ruttâdeijeeh láá Laapi litto Suomâ peln sehe Västerbotten já Norrbotten läänih Ruotâ peln.
Koveh: Interreg Aurora (logo) já Fabrizio Brecciaroli (eres koveh)