Säminuorâi kyevtipiäivásâš taaiđâtábáhtus uárnejuvvoo Anarist cuáŋuimáánu 26.–27. peeivi. Läävdi alne láá 20 čájáttâssâd, já sämmilii tyejičájáttâsâst láá fáárust 23 tyeijid.
Taan ive taaiđâtábáhtume broošyyr lii olášittum kovekollaasin. Brošyrist láá detaljeh jieškođe-uv sämijuávhust.
Broošyyr tuálá sistees sämiluokai sárgum taiđuu, main ivnepalettin láá sämi-ivneh já moi fáádáin uáinoo taaiđâtábáhtus taanihásâš nubbe teema: oovdânpyehtee taiđuuh.
Oovdânpyehtee taaiđâ puáhtá toollâđ sistees om. muusik, teatter, taansâ, stand up já läävdi alne tivtâstem.
Nubben teeman vist lii sämityeji. Säminuorâi tyejeh láá uáinimnáál tábáhtus ääigi. Nuorâi rähtim taaiđâ čáittoo meid Saijoos šeermâin siisâ puáđidijn.
Siisâ Sajosân puáđidijn puáhtá veik rähtistiđ olssis piinsi Aanaar kieldâ nuorâitooimâ pargein Ida Lassilain.
Proojeektpargee Miia Ruokojärvi muštâl Anarâš aavisân, et koskoho olášittojeh pargopáájáh nuoráid sehe Sajosist já Siidast. Tuorâstuv lii tábáhtus váldupeivi, já talle ohjelmist láá čájáttâsah.
Taaiđâtábáhtusân láá uásálistmin 320 olmožid.
Koveh: Marja-Liisa Olthuis