Uŋgar parlament lii ratifisistám Suomâ Nato-ucâmuš onne, vuossaargâ njuhčâmáánu 27. peeivi, jienâigijn 182 peeleest, kuuđâs vuástá. Uŋgar jienâstem lii voonnâm, já tot lii ettâm, et tot ij ááigu ratifisistiđ Suomâ majemužžân. Tuurki parlament olgoašij váljukodde tuhhiittij Suomâ Nato-jeessânvuođâ njuhčâmáánu 24. peeivi.
Suomâ Naton peessâm lii val kiddâ Tuurki jienâstmist. Tuurki president Recep Tayyip Erdoğan lii lopedâm ratifisistiđ Suomâ jeessânvuođâ ovdil vaaljâi, moh tuállojeh vyesimáánust.
Uŋgar parlament ij vala ratifisistám Ruotâ jeessânvuođâ.
Ilta-Sanomai mield maaŋgah politikkáreh láá reagistám Twitterist ratifisistem kuullâm maŋa. Ovdâmerkkân uáiviminister Sanna Marin twiittaa ratifisistmist näävt:
”Uŋgar lii ratifisistám Suomâ Nato-jeessânvuođâ. Kijttoseh čielgâ lovoigijn tohhum miärádâsâst! Suomâ já Ruotâ jeessânvuotâ nannejeh ubâ littokode torvolâšvuođâ. Lii puohâi hiätu, et meid Ruotâ lii Nato jeessân ovdil Vilna njunoščuákkim.”
Käldee:
– Unkarin parlamentti ratifioi Suomen Nato-jäsenyyden (www.is.fi)
Kove: Leonhard Niederwimmer (Pixabay)