Saksaast junáh já kirdemmašineh iä onne jođe ubâ enâmist váruttâsjaskoi keežild. Viijđes pargo-orostittem jotoluvâst aalgij koskâiijâ, já áárvu mield tot pištá ubâ pirrâmpeeivi. Váruttâsjaskoin áámmátlitto ver.di já ryevdirađe- já jođettemsyergi áámmátlitto EVG halijdeh lasettiđ tedduu pälkkiráđádâlmáid joođoost leijee pargoiähtusopâmušráđádâlmijn. Ver.di lii avžum 120 000 parged já EVG 230 000 bussi- já ryevdirađeparged jaaskon.
Čiččâm uásistaatâst lii jaskoost meid páihálâš juávkkujotolâh. Taah staatah láá Baden-Württemburg, Hessen, Niedersachsen, Nordrhein-Westfalen, Rheinland-Pfaltz, Sachsen já iänááš uási Bayernist. Junáh, buusih já kirdemmašineh iä jođe ubâ Saksaast onne. Pargotaištâlmeh tovâtteh vyerdimist ennuv jotteemvuárui maaccâtmijd já nuorbâsijd ubâ jotoluvâst.
Kuhes määđhi junájotolâh orostittoo puohrâkkân, já stuorrâ uási páihálii jotoluvâst jaska jotemist. Masaba puoh kirdemkiedih láá jaskoost, pic Berlinist puoh tuáimá táválávt. Tobbeen-uv láá ennuv kirdemvuárui maaccâtmeh. Meiddei čäciväävlih já hamâneh sehe moottorkiäinufinnodâh kierdih jaskoost.
Meiddei jotolâhnuorbâseh láá vyerdimist, tastko maaŋgâs sirdojeh kevttiđ jieijâs auto almos jotoluv orostittem keežild.
Käldee:
– Züge, Busse und Flugzeuge stehen still (www.tagesschau.de)
Kove: Mathew Browne (Pixabay)