Olympialiih nuhhii okko tassaaš Milano–Cortinast. Näävt smavvâ lostâžân ko Anarâš aavisân lii kunnee muštâliđ suullân äigikyevdilávt maailm merhâšitteemuu valastâllâmtábáhtuumeest. Ohtâ uuđâs jyehi argâpeeivi addel máhđulâšvuođâ muštâliđ tuše puoh tehelumosijn luhostuumijn, veik tábáhtusah já mainâseh liččii lamaš ubâ ive loostâ várás. Juáháš, kote piäsá ovdâstiđ enâmis olympialáid, ličij maaŋgâ mainâs árvusâš.
Mitalij šiälgum
Suomâ ulmen lâi juksâđ olympialijn kuttâ miitaal, já taat ulme olášui-uv. Suomâ juávkku maacâi pááikán viiđáin pronssijn já ovttáin silbáin.
Olympialij loppâkeččin jieŋâskiärruspellei pyehtim pronssimiitaal lieggij syemmilij vááimu. Suomâ pronssispellâ Slovakia eromâš nuorâ juávhu vuástá ij orroom ubâ vädisingin: Suomâhân vuoitij speelâ čielgâ lovoigijn 1–0, 1–1, 4–0. Nube tááhust jo ärbi-uv kenigitij pronssispeelâ vyeittimân, tastko Suomâ ij lah ohtiigin táppám pronssispeelâ, jis tot lii ton räi olláám. Suomâ Leijoneh láá tääl vuáittám ohtsis käävci olympiamitalid: oovtâ kole, kyehti siilbâ já vittâ proonsi.
16 čyegissaijeed Suomân
Suomâ juuvsâi olympialijn ohtsis 16 čyegissaijeed čuávuvávt:
- 4. saje Olli Hiidensalo, normaalmätki, pääččimčuoigâm
- 4. saje Lauri Vuorinen, ärbivuáválii sprintti, čuoigâm
- 4. saje Almai viestâ (Vuorinen, Niskanen, Ruuskanen, Anttola), čuoigâm
- 5. saje Kerttu Niskanen, 10 + 10 km kombinistemčuoigâm
- 5. saje Ilkka Herola, normaalluáhá kišto, ovtâstittum kišto
- 5. saje Eero Hirvonen, stuorrâluáhá kišto, ovtâstittum kišto
- 6. saje Suvi Minkkinen, huáppumätki, pääččimčuoigâm
- 6. saje Siähálâsviestâjuávkkudâh (Hiidensalo, Seppälä, Hämäläinen, Minkkinen), pääččimčuoigâm
- 6. saje Nisonij juávkkudâh, jieŋâskiärru
- 6. saje Siähálâsjuávkkudâhluákká (Hirvonen, Palosaari, Rautionaho, Kytösaho), luákkánjuškim
- 7. saje Nisonij viestâjuávkkudâh (Hämäläinen, Leinamo, Lehtonen, Minkkinen), pääččimčuoigâm
- 7. saje Almai viestâjuávkkudâh (Hiidensalo, Seppälä, Klemettinen, Invenius), pääččimčuoigâm
- 7. saje Kerttu Niskanen, ärbivuáválii 50 km, čuoigâm
- 7. saje Arsi Ruuskanen, ärbivuáválii 50 km, čuoigâm
- 8. saje Anni Kärävä, slopestyle, freeski
- 8. saje Anni Kärävä, big air, freeski
Käldee: Milano-Cortina 2026: Milano-Cortinan talviolympialaiset päätökseen – Suomen saldona kuuden mitalin potti (www.olympiakomitea.fi)
Dramatiik olympialijn
Dramatiik olympialijn ij váilum. Ameriklâš puáibildeijee Lindsay Vonn roovâi ovdil olympialij já lammij čižeppel iddus. Sun puovtij kuittâg uásálistiđ olympialáid, mut sun roovâi oppeet kištoos ääigi já lammij jieijâs uáli jo viärráht. Suu čižetjyelgi lii čuopâdum vittii taam čälidijn, já čuopâdmeh juátkojeh ain. Suu puáránemproosees pištá kuhháá.
Meiddei syemmilâš Elias Lajunen roovâi freeski big air karssâmijn já kaartâi viettiđ iijâ pyecceiviäsust tarkkuumist vuoiŋâšspiđgám keežild.
Suomâ njunoščyeigee Iivo Niskanen vist fattiittâdâi leencun, ige sun pyeccen puáhtám čuoigâđ jieijâs braavuurmääđhi 50 kilomeetter kišto loopâ räi, pic sun ferttij koskâlduttiđ jo 15 kilomeetter čuoigâm maŋa.
Avveellâš Kuura Koivisto olympialijn
Avveellâš Kuura Koivisto lâi tavemus Suomâ ovdâsteijee olympialijn. Sun juuvsâi kuohtii 14. saje, vistig freeski slopestylest já ton maŋa big airist. Koivisto kiddij mediast eromâš huámášume jieijâs vuovvijn kárvudâttâđ tuše keppisávt já kyeđđiđ pääiđis meddâl. Suu vuálospuáttimstijlâ-uv lii eromâš já jiešlágán, meiddei tuámárij mielâst.
Kuurâ lâi pyehtiđ finniđ olympiadebyytis jo Peking kištoin 2022, jis suu iidâ ij liččii talle väividâm.
Miitaaltavlustâh já miitaalsumeh
Milano–Cortina olympialijn Taažâ uulij miitaaltavlustuv njunošân ko tot vuoitij ohtsis 43 mitalid (18 kolled, 12 silbâd já 11 pronssid). Taažâ mitalijn kuttâ pottii čyeigee Johannes Høsflot Klæbo áánsust. Sun vuoitij puoh maađhijd, moid sun jo uásálistij. Nubben poođij miitaalsaldostis Ovtâstum staatah 33 mitalijnis (12 kolled, 12 silbâd já 9 pronssid). Kuálmádin uulij Vuáládâhenâmeh 20 mitaláin (10 kolled, 7 silbâd já 3 proonsi). Jieškote-uv eennâm lii jieijâsnáál pyeri: Taažâ juávkku vuoitij iänááš mitalijdis ärbivuáválijn šlaajâin, tego čuoigâmist, luákkánjuškiimist já ovtâstittum kištoost. Ovtâstum staatah vist lâi pyeri uđđâsub olympiašlaajâin. Vuáládâhenâmij puoh mitaleh pottii luistâlmist. Suomâ uulij ubâlii miitaalstatistiikist sajan 23.
Ain lii pyeri tiettiđ tom-uv, maid valastâllee tiänáá jieijâs miänástuumijn. Suomâst olympiakolleest finnee 50 000 eurod, siilbâst 30 000 eurod já proonsist 20 000 eurod. Ovdâmerkkân Vuáládâhenâmijn västideijee sumeh láá 30 000 eurod kolleest, 15 000 eurod siilbâst já 7 500 eurod proonsist. Vuáládâheennâmlii mitalist puursâ tiävdá tuše ohtâ máksu valastâllee pyeremuu puátusist. Adai Suomâ tienâseh iä lah aaibâs hyenemuu kategoriast. Italiast vist kole vyeittee finnee 178 000 eurod, siilbâ vyeittee 89 000 eurod já proonsi vyeittee 59 000 eurod.
Käldeeh:
– Olympics Medal Table (www.olympics.com)
– Olympiakisojen mitalibonuksissa hurja hintahaitari – Suomi avokätisin Pohjoismaa (yle.fi)
– Dit verdienen Nederlandse en buitenlandse olympiërs met hun medailles (www.ad.nl)
Puátteevuođâ jurduuh
Suomâ juávkkuduv hovdâ já Suomâ olympiakomitea njunošvalastâllâmhovdâ Janne Hänninen čielgee, et Suomâ ferttee olleeđ pyereeb táásán árvukištoin puátteevuođâst.
– Mij lep eidu ovdil Milano algâttâm merhâšittee uđâsmittemtooimâid ovdâmerkkân valastâllei išeruuđâi já šlaajâi toorjâsysteem tááhust. Mij juátkip nubástusâigijn, tastko ovdebáin vuovvijn teikâ smavvâ nubástusâigijn mij ep piergii pyerebeht. Toimâi vaiguttâs kalga oinuđ majemustáá 2030‑lovo olympialijn. Fokus kalga leđe čyetiprooseentlávt njunošvalastâllâm váimusist adai tast, moin naalijn valastâlleeh šaddeh fyysisávt, teknisávt já taktisávt pyerebin, moin naalijn mij kavnâp maailm njunošpotentiaalân kullee valastâlleid jo tolebiššáá já moin naalijn mij pastep tuárjuđ sii pyerebeht ko tääl.
Hänninen muštoot, et miänástus ij lah tuše Olympiakomitea ovdâsvástádâs, pic juáháš ferttee tarkkuustâllâđ kriittisávt jieijâs pargo – nuuvt šlajâlitoh, valastâlleeh, välmejeijeeh ko tuáváášjuávhuh‑uv. Adai puoh njunošvalastâllâm tuáimeeh kalgeh västidiđ taan vátámuštáásán.
Käldee: Milano-Cortina 2026: Milano-Cortinan talviolympialaiset päätökseen – Suomen saldona kuuden mitalin potti (www.olympiakomitea.fi)
Anarâš aavis olympianievdâmeh
Naver ličij tiäđust-uv motomin peessâđ jieš-uv pääihi oolâ, apseđ já tubdâđ olympiavuoiŋâ. Nube tááhust ij tot liččii tađe komálub ko vyelgiđ já čalâččiđ. Čuávuvâš máhđulâšvuotâ leđe tälviolympialij toimâtteijen lii neelji ive keččin ive 2030 Ranska Chamonixist. Čuávuváid olympialijd mij tääl pääccip vyerdiđ. Ton räi valastâlleeh-uv kiergâneh val mottoom tove treenađ já toimâtteijeeh saijeeđ peenâs.
Kove: ERIC SALARD (Wikimedia Commons)