Tampere Nokia-areena láávgui muusikist lávvárdâheehid, ko tobbeen olášittui UMK ađai Uđđâ muusik kišto fiinaal. Suomâ ovdâsteijen Euroviisuid 2026 väljejuin Linda Lampenius já Pete Parkkonen pitáinis Liekinheitin ’Tullârussoo’. Lampenius já Parkkosii kyevtis vuoittijn sehe keččei adelem čuággáigijn já raađij adelem čuággáigijn. Keččei adelem čuággáid suoi finnijn 492, mii lâi 102 čyegisid eenâb ko maid puoh eres kištottâlleeh oovtâst finnejii keččein.
UMK:st kištottâllii taan ive čiččâm artistid. Vyeittei lasseen sij lijjii Etta, Chachi, Kiki, Antti Paalanen, Sinikka Monte já Komiat-muusikjuávkku.
Euroviisuh uárnejuvvojeh taan ive vyesimáánust Nuorttâriijkâ uáivikaavpugist Wienist. Suomâ kištottâl vuosmuu semifinalist vyesimáánu 12. peeivi. Fiinaal uárnejuvvoo vyesimáánu 16. peeivi.
Taan ive maaŋgah enâmeh láá boikotistám Euroviisuid Israel uásálistem keežild. Suijân lii Israel volliittem Gazan.
Linda Lampenius já Pete Parkkonen kommentistijn boikotistemfáádá jo muuneeld. Suoi lává almottâm, et suoi uásálistev Euroviisuid, jis suoi vyeittiv UMK.
– Jis muoi uážžoon kunnee ovdâstiđ Suomâ, te muoi pargeen tom muusik já olmoošvuođâ peeleest. Munnuu mielâst miärádâs tipteđ Israel uásálistiđ Euroviisuid lii puástud. Tábáhtumeh Palestiinast láá epiolmoošliih já tuommiittetteeh, suoi čaalijn Instagramist.
Ton maŋa ko poođij tiätu Israel uásálistmist, Euroviisuin láá kiäsádâttâm vittâ eennâm: Espanja, Irland, Vuáládâhenâmeh, Island já Slovenia.
Tijmá Suomâ ovdâsteijen Sveeicist uárnejum Euroviisuin lâi Erika Vikman pitáinis Ich komme. Ton lasseen Ruotâ ovdâsteijen lâi syemmilâš lávlumjuávkku KAJ. Tot láávlui ruotâkielân Vöyri kuávlukielân.
Meid taan ive UMK selvâttui kyevti sämikielân. Anarâškielâ uási laiđij Heli Huovinen já tavesämikielâ uási Linda Tammela. UMK lii uáinimist Yle Areenast.
Käldeeh:
– Pete Parkkonen ja Linda Lampenius saivat monsteripisteet (www.is.fi)
– Tässä ovat UMK-voittajat vuonna 2026: Linda Lampenius ja Pete Parkkonen (www.is.fi)
Kove: niekverlaan (Pixabay)