De! 2 -haahâ já Laapi pyereestvaijeemkuávlu sämikielâlij já kulttuurmiäldásij sosiaal- já tiervâsvuotâpalvâlusâi ovdâsvástádâsohtâdâh uárnejeh ohtsâšpargon viärdásâšjuávhu 18–25-ihásáid säminuoráid, kiäid ij lah sirdum jieijâs suuvâst sarnum sämikielâ. Almottâttâm juávkun lii áávus.
Viärdásâšjuávhu ulmen lii lasettiđ mielâ pyereestvaijeem sehe nanosmittiđ säminuorâi identiteet já sämisiärvusân kuullâm. Juávkku fáálá torvolii pirrâs, mast nuorah pyehtih teivâđ eres siämmáá tiileest leijee nuorâid, uážžuđ sierâlágánijd uáinuid sämmilâšvuotân já kavnâđ uđđâ skipárijd sämisiärvus siste.
Teivâdmeh láá ohtsis kuttâ 25.3. já 3.6.2026 koskâsii ääigi. Jyehi teivâdmist lii miinii fáádáid, mutâ ain lii saje meid rijjâ savâstâlmân já oovtâst oromân. Teivâdmeh uárnejuvvojeh káidusin Teams peht jyehi nube koskoho tijme 17.30–19.30. Uárnejeijeeh tuáivuh, ete uásálistein ličij máhđulâšvuotâ servâđ teivâdmáid video-ohtâvuođáin.
Juávkun almottâttâm lii áávus 25.2.2026 räi.
Sajeh viärdásâšjuávhust láá räijejum. Ovdil juávhu aalgâ uárnejeijeeh tuálih jyehi fáárun almottâttâm nuoráin uánihis teivâdem Teamsist. Tobbeen savâstâlloo vuárdámušâin já tuoivuin viärdásâšjuávhu háárán. Väljejum uásálisteid vuolgâttuvvojeh ravvuuh juávkun uásálistmân šleđgâpostáin.
Lasetiäđuid finnee juávhu stivrejeijein:
– Irene Fofonoff (irene.fofonoff@samediggi.fi; 044 902 8615)
– Pilvi Vuomajoki (pilvi.vuomajoki@lapha.fi; 040 650 7559).
Käldee:
– ”Se tunne, kun saamen kieli puuttuu”-vertaisryhmä (nuor.fi)
Kove: Pexels (Pixabay)