Tanska tiiláá piäluštâsráhtádâsfinnodâh Patriast 129 CAVS 6×6 -panssarfiävrud, moh vuáđuduveh Patria 6×6-fiävrun. Fiävruh valmâštuvvojeh Patria fabrikist Hämeenlinnast. Patria mield vuosmuuh fiävruh toimâttuvvojeh Taanskan jo taan ive peln.
CAVS ađai Common Armoured Vehicle System lii haahâ, mast staatah ovdedeh panssarfiävrui vuáháduv, mii tiävdá jeessânenâmij ohtâsijd vátámâšâid. Haavâ pieijii joton Suomâ já Latvia ive 2019. Toi lasseen haavâst láá tääl fáárust Ruotâ, Saksa já Tanska.
– Patria lii uáli jo tuđâvâš toos, ete tääl Tanska-uv lii ovdánâm ráiđuskappummuudon. Tanska jotelis já meritiäđulâš ovdánem CAVS-fiävruhaavâst lii lamaš eromâš ovdâmerkkâ tast, maggaar tááláá ääigi maaŋgâaalmuglâš ohtsâšpargo kolgâččij leđe, iätá Mats Warstedt, Patria Tave-enâmij markkânkuávlu jođetteijee.
Patria joođeet CAVS-haavâst 6×6-panssarfiävrui vuáháduv ovdedem. Haavâ tiet Patriast láá tiilájum jo masa 1 000 fiävrud, main 200 láá tääl toimâttum.
Finnoduv pyevtittâsah já palvâlusah kiäsutteh ain eenâb. Tot uáinoo ovdâmerkkân tast, ete Hämeenlinna fabrikist tarbâšuvvojeh lase pargeeh já mättim. Patria lii-uv viijđedmin Hämeenlinna puovtâdâslágádâs suulân 40 miljovnáin euroin. Uđđâ sajeh ležeh valmâšeh ive 2027.
Patria omâsteh Suomâ staatâ (50,1 %) já Taažâ Kongsberg Defence & Aerospace AS (49,9 %).
Käldeeh:
– Tanska tilaa 129 Patrian panssaroitua ajoneuvoa (yle.fi)
– Tanska etenee CAVS-ajoneuvohankkeen viimeiseen vaiheeseen ja tilaa 129 panssaroitua Patria 6×6 -ajoneuvoa (www.patriagroup.com)
Kove: Piäluštâsvyeimih