Anarâškielâ servi, Oulu ollâopâttuv Giellagas-instituut já Wikimedia Suomâ uárnejeh Wikipedia-páájá Oulu ollâopâttuv Linnanmaa kampusist kesimáánu 7.–8. peeivi tijme 10–16. Uásálistiđ puáhtá meid káidusin já uánihub ääigi ko kyehti peeivi, ađai tommittáá ko čällest lii asto. Páájá stivriv Anarâškielâ seervi mediapargee Fabrizio Brecciaroli já anarâškielâ ollâopâttâhlehtor Marja-Liisa Olthuis. Wikimedia Suomâst lii fáárust aainâs-uv Kimberli Mäkäräinen.
Páájá tuálloo Oulu ollâopâttuv salist Lo130. Tot álgá iđedist tme 10. Uásiväldeeh pyehtih puáttiđ eidu ovdil páájá älgimääigi váldu-uuvsâ oovdân. Jis áigu puáttiđ fáárun eres ääigi, talle kalga suáittiđ uárnejeijeid tondiet ko uuvsah iä veltihánnáá lah áávus. Káidusuásálistemtáárbust ferttee almottiđ (fabrizio.brecciaroli@gmail.com) muuneeld.
Juurdân lii čäälliđ artikkâlijd Wikipedian teikkâ tivvoođ artikkâlijd, moh láá jo tobbeen. Jis ij haalijd čäälliđ tâi tivvoođ artikkâlijd, lii meid máhđulâš lasettiđ jieškote-uvlágánijd tiäđuid artikkâláid tegu käldeid tâi kuuvijd. Puohah uážžuh čäällimsis kielâlii já teknisii torjuu. Meiddei tagareh ulmuuh, kiäh iä lah kuássin ovdil čáállám Wikipedian, láá lieggâsávt tiervâpuáttám. Anarâškielâ servi tuáivu-uv, et uđđâ ulmuuh puáđáččii fáárun. Lase Wikipedia-čälleid lii korrâ tárbu, tastko táálááh Wikipedia-čälleeh čäälih tääl meiddei Anarâš aavisân já eres soojijd.
Anarâškielâlâš Wikipedia šoodâi virgálávt roovvâdmáánu 19. peeivi 2020 tme 15.07. Vyesimáánu 14. peeivi 2025 tobbeen lijjii jo 6 225 artikkâlid. Wikipedia-pargo ij lah tuše artikkâlij čäällim. Artikkâlij várás ferttee meiddei huksiđ infrastruktuur ađai luokkaid, myensterijd já modulijd. Jis luokah, myenstereh já moduleh váldojeh fáárun, te anarâškielâlii Wikipediast láá jo 26 139 sijđod.
Jis ij lah asto uásálistiđ tääl kiiđâ majemuu pargopááján, te Anarâškielâ servi, Oulu ollâopâttuv Giellagas-instituut já Wikimedia Suomâ áiguh orniđ nube pargopáájá Oulust čohčuv. Lasetiäđuh tast almostittojeh maŋeláá Anarâš aavisist.
Kimberli Mäkäräinen
Kove: Oulu ollâopâttâh / Ville Pohjonen