Suomâst láá jyehi ive suulân 2 500 iŋádâhtullâd. Stuárráámus uási tain šaddeh ulmui huolâttesvuođâ keežild. Áimutiettuu lágádâs meteorolog Tuomo Bergman mield puáluriskâ šadda stuárráábin puátteevuođâst, tastko šoŋŋâdâhnubástus keežild enâdâh košká älkkeebeht já puálupajeh kukkoh ko muotâ suddá tolebáá.
Iŋádâhtuulâi estâdem tiet lii sundáttâllum väldikodálâš Käpy palaa -kampanja, mii movtijdit já rävvee ulmuid kieđâvuššâđ tuulâ torvolávt. Kampanjan kuleh raavâmateriaaleh já videoh, main feeriv uárreekyevtis Vili já Veli. Materiaalij sundáttâlmist láá kevttum vuáđuškovlâláid uáivildum tutkâmuš puátuseh.
– Tutkâmušâst čielgâi, ete ovdâmerkkân ávustullâ já iŋádâhtullâváruttâs lijjii maŋgáid västideijeid viäráseh. Motomeh arvâlii joba, ete váruttâsâi ääigi miäcán ij kannat moonnâđ ollágin, iätá dooseent já spesiaaltotkee Brita Somerkoski Tuurku ollâopâttuvâst.
Kampanja aalgij vyesimáánu 5. peeivi Yle televisiokanavain. Ton váldukyeimin láá Puálusuojâlemruttârááju já Partioaitta Oy.
Käldee:
– Kampanjan suunnittelu ja mediayhteydet (kapypalaa.fi)
Kove: mostafa meraji (Pixabay)