Anarâš aavis tieđettij vyesimáánu 20. peeivi, ete Romania uđđâ presidentin lii väljejum Bukarest EU-miäldásâš saavâjođetteijee Nicușor Dan 54 % jienâlovvoin. Maŋeláá 20. peeivi suu vyesti-iävtukkâs George Simion lii kuittâg almottâm, ete áigu ánuttiđ Romania vuáđulahâtuámustoovli hilgođ puáttus.
Simion, kote lii robdâuálgispiäláduv AUR jođetteijee, lâi jo tolebáá mieđettâm táápus.
– Mun halijdâm tuáivuttiđ luho muu vuástálistei Nicușor Danân. Sun lii vuáittám vaaljâid, já taat lâi Romania aalmug táttu, Simion lâi ettâm ton maŋa, ko vaaljâi puátuseh lijjii puáttám.
Tääl Simion váátá, ete vaaljâi puáttus kalga hilgođ siämmáá suujâst ko vuosmuuh vaaljah hilgojii. Moonnâm skammâmáánust Romania vuáđulahâtuámustovli hilgoi presidentvaaljâi vuosmuu jienâstemkeerdi puáttus tondiet ko ton mield Ruoššâ lâi siähánâm valjáid. Simion mield tááláid valjáid láá siähánâm aainâs-uv Ranska já Moldova.
Anarâš aavis tieđeet, maht Romania presidentvaaljâin loppâloopâst kiävá.
Käldeeh:
– EU-myönteinen Nicușor Dan on voittanut Romanian presidentinvaalit (yle.fi)
– Romanian presidentinvaalien häviäjä ei hyväksykään tulosta (yle.fi)
– Defeated Romanian ultranationalist ‘will ask court to annul election’ (www.theguardian.com)
Kove: AUR Alianța pentru Unirea Românilor (Wikimedia Commons)