Moonnâm tuorâstuv Ibsen-táálust uárnejum tilálâšvuođâst Skien kieldâ mieđettij Juho-Siren ađai Siri Broch Johansenân taan ive Ibsen-palhâšume čaitâlmist Per Hansen. Čaaitâlm vuosâeehid lâi Riijkâläävdist, Oslost roovvâdmáánu 3. peeivi 2024. Eres iävtukkâsah lijjii Nobel-kirjálâšvuotâpalhâšume vyeittee Jon Fosse čaitâlmist Einkvan sehe Toril Goksøyr já Camilla Marten čaitâlmist MoMA.
Ive 1986 rääjist juohhum Ibsen-palhâšume lii Taažâ áinoo palhâšume dramaatlii teevstâ čällei. Tom mieđeet jyehi ive Skien kieldâ. Palhâšume juáhhoo taggaar draamateevstâ čällei, mon maailm teikkâ Taažâ vuosâeehid lâi áámmátteatterist Taažâst ovdebáá kalenderive ääigi. Teevstâ čällee kalga jo-uv aassâđ teikkâ porgâđ Taažâst. Palhâšummeen vyeittee uážžu 150 000 NOK já Nina Sundbye vuávám páccá.
Kimberli Mäkäräinen
Käldeeh:
– Vinner av Ibsenprisen 2025 er Siri Broch Johansen (www.skien.kommune.no)
– Siri Broch Johansen tildelt Ibsenprisen 2025 (www.nrk.no)
– To voksne mennesker og én altoppslukende forelskelse (www.riksteatret.no)
Kove: Bitjungle (Wikimedia Commons)