Fuji-väärist Japanist lii taan täälvi muáttám vuossâmuu keerdi eskin skammâmáánust. Brittilii almosradiofinnoduv BBC mield Jaapaan áimutiettuu lágádâs Shizuoka toimâmčyegis uáinistij muottuu Fuji-vääri čohheest skammâmáánu 6. peeivi. Jaapaan šoŋŋâtoimâttâh ij tuáistáážân nanodâm, kuás vuosâmuotâ lii puáttám Fuji-väärist.
Taan ive Jaapaan ollâgumos väärist lii muáttám paijeel mánuppaje maŋeláá ko táválávt. Muotâloovdâ šadda Fuji-vääri čookán koskâmiärálávt roovvâdmáánu nube peeivi. Ive 2024 Japanist lâi ohtâ eennâm mittedemhistorjá pakkâsumos keesijn, já lieggâ šoŋŋâ jotkui kuhháá vala čohčuv-uv.
Skammâmáánu aalgâst ij lamaš vala muáttám Fuji-väärist, mii lâi vuossâmuš kerdi aainâs-uv 130 ihán, ko väričokke lâi vala skammâmáánust päljisin. Kofu-kaavpug virgeomâhááh láá ive 1894 rääjist almottâm Fuji-vääri vuosâmuottust. Ovdebâš ulâttâs lâi iivij 1955 já 2016, kuás vuosâmuotâ poođij Fuji-väärist roovvâdmáánu 26. peeivi.
Fuji-vääri lii 3 776 meetterid olluv. Tot lii lamaš UNESCO maailm ärbičuosâttâh ive 2013 rääjist. Fuji-vääri rusoi majemuu keerdi paijeel 300 ihheed tassaaš.
Käldeeh:
– Fuji-vuoren huippu sai vihdoin lumipeitteen – lumi satoi poikkeuksellisen myöhään (www.hs.fi)
– Japanin korkeimmalla vuorella ei ole lunta – Tällaista tilannetta ei tiedetä olleen aiemmin (www.hs.fi)
– Snow back on Mount Fuji after longest absence (www.bbc.com)
– Snow seen on Mount Fuji after record absence (www.channelnewsasia.com)
Kove: Alpsdake (Wikimedia Commons)