23 viärjukenigâsvuođâlâžžâd láá lammâšum Avelist luhottesvuođâst, ko telakyermiauto kománij räjijáágárkomppania hárjuttâllâmkuávlust. Kyevtis lává lammâšum viärráht. Suoi lává tolvum Ruávinjaargâ kuávdášpyecceiviäsun. 21 viärjukenigâsvuođâlâžžâd láá tolvum Avveel tiervâsvuotâkuávdážân.
MTV uđđâsij mield Avveel tiervâsvuotâkuávdáš lii pokkâšum luhottesvuođâ keežild.
Laapi piäluštâslágádâs finnij larmâdâs räjijáágárkomppania kuávlun tijme 8:54 koskoho iđedist.
Pääihi oolâ pottii piäluštâstooimâ ohtâduvah Avelist já ton aldakuávluin, ohtsis kuttâ ohtâduv. Meiddei räjijáágárkomppania pargeeh já kálvuduvah puáhtojii išán.
Laapi piäluštemlágádâs išedij vuosâiše pärttisaajeest já toopâi kyermiauton šoddâm puáldámušavedem.
Laapi räjikosáttâh lii lamaš ohtâvuođâst lammâšum viärjukenigâsvuođâlij perruid.
Poolis totká päärti suujâid.
Käldee:
– 23 varusmiestä loukkaantui kun telakuorma-auto kaatui – Poliisi tutkii syitä (www.hs.fi)
Kove: Katja Bogdanoff