Egypt lii virgálávt malariarijjâ eennâm. Tot lii kulmâ ive maŋaluvâi pastam tuođâštiđ, et enâmist iä lah innig kavnum malariačuoškâi tovâttem tavdâtábáhtusah, nannee maailm tiervâsvuotâorganisaatio WHO. Ton lasseen Egypt pasta puátteevuođâst-uv toollâđ eennâm rijjâ malariast.
”Taat lii historjálâš”, iätá WHO njunoš Tedros. Malariatavdâ máccá Egypt historjást faaraoi ááigán. Tobdos faarao Tutankhamon (1341–1323 oKr.) pasâttâsâi skannam lii čáittám, et sun máhđulávt jaamij malarian já idduu kudduumân.
Paijeel čyeti ihheed tassaaš eennâm tallaš stivrâ algâttij tooimâid malaria vuástá. Talle riisi já eres eennâmtuálupuovtâdâsâi viljâlem kieldui asâttâsâi alda, tastko ulmen lâi finniđ malariačuoškâid meddâl. Malariapyeccei lovoh tuođâšteh kuittâg, et taan miärádâsâst ij lamaš ennustkin ävkki: ive 1942 Egyptist lijjii kulmâ miljovn malariapyecced, ige taavdâ tálhudem toohâm älkkeebin totkin, et nube maailmsuáđi ääigi talkkâseh iä lam finniimist.
Malaria šievnáál kuorâmáin, táálhudmáin já ulmui čuovvitmáin tavdâ lii kuittâg tääl lappum.
Tääl WHO lii kulluuttâm paijeel 40 enâmid maailmist malariarijjâ enâmin. Taah enâmeh láá luhostum porgâđ ennuv malaria vyeittim oovdân. Tavdâ ij lah kuittâg ollásávt vuoittum: maailmist jyehi ive 600 000 olmožid jäämih malarian, eromâšávt Afrikist. Taan oovdân kalga vala ennuv porgâđ.
Käldee:
– Egypte na 100 jaar bestrijding malariavrij (nos.nl)
Kove: zes dho (Pixabay)