Haag kaavpug Vuáládâhenâmijn lii maailm vuossâmuš kaavpug, mii kiäldá fossiilmáinusijd. Ive 2025 aalgâ rääjist kaavpugist ij uážu innig máinuđ šoŋŋâdâhân háitulijd fossiillijd puáldámušâid ige ovdâmerkkân bensinautoid teikâ luámukirdem- tâi ruossâlistemmaađhijd.
Kiäldu kuáská olgosoojijd, tego puohlágánáid máinuskolbáid, ovdâmerkkân bussiorostuvâi máinusáid. Hollandlii NOS-loostâ mield kiäldu ulguubel pääcih ovdâmerkkân irâttâsâi noomah, logoh sehe máinuseh rakânâsâin, main irâttâsâi tooimah tábáhtuveh.
Groningen ollâopâttuv pirâspsykologia išeprofessor Thijs Bouman iätá, ete fossiillij puáldámušâi máinum hiäjusmitij šoŋŋâdâhpolitiik, tastko máinum normalisistij já ovdedij tagarij pyevtittâsâi kulâttem, moh iä lah kileleh. ”Tarbâšuvvojeh stuorrâ investistmeh staatâ peln tuástuđ fossiilmáinum negatiivlijd vaikuttâsâid. Jis fossiilmáinum kiäldoo, te taid resursijd puáhtá kevttiđ pyerebeht, ovdâmerkkân kilelis muulsâiävtui já palvâlusâi, tego almolii jotoluv, naanoodmân.”
Motomeh eres-uv kaavpugeh láá irâttâm raijiđ tagarij pyevtittâsâi tâi palvâlusâi máinum, moh tovâtteh ennuv čiđđâdioksidluáštádâsâid. Ovdâmerkkân Skotland uáivikaavpug Edinburgh váldustivrâ meridij vyesimáánust kieldiđ fossiillijd puáldámušâid valmâštee irâttâsâi, kirdemfinnoduvâi, kirdemkiedij, fossiillijd puáldámušâid kevttee autoi, ruossâlistemtaampâi já viärjui máinum máinussoojijn, moi omâsteijee lii váldustivrâ. Tágárijd pyevtittâsâid vyebdee irâttâsah iä meidgin pyevti innig sponsoristiđ tábáhtuumijd Edinburghist.
Ovtâstum aalmugij uáivičällee António Guterres avžui kesimáánust puoh staatâid kieldiđ fossiillij puáldámušâi máinum. Suu mield tile puáhtá verdidiđ tubbáák máinumân, mii lii meid kieldum tiervâsvuotâsuujâi tiet.
Käldeeh:
– Haagin kaupunki kieltää fossiilimainokset – auto- ja lentomainokset katoavat katukuvasta (www.hs.fi)
– The Hague becomes world’s first city to pass law banning fossil fuel-related ads (www.theguardian.com)
Kove: Rene Mensen (Wikimedia Commons)