Oovtviärdásâšvuotâváldálii Sämitiigán juáhám tiätupivdem mield Suomâ alemuu haldâttâhrievti (AHR) miärádâsâin 27.3.2024 iä puáttám oovdân olgoštemkiäldun lohtâseijee uáinuh. Nuuvt čáálá Sämitigge tiäđáttâsâstis. Tiätu lohtâs toos, et AHR meridij 27.3.2024 merkkiđ maajeeldkietân 65 olmožid Sämitige ive 2023 vaaljâluvâttâlmân Sämitige miärádâsâi vuástásávt já orniđ uđđâsist sämitiggevaaljâid. Sämitige vaaljah toimâttuvvojii uđđâsist 3.6.–1.7.2024.
”Oovtviärdásâšvuotâváldálii tiätupivdemân AHR:st puáttám vástádâs uáivild tom, ete Sämitige vaaljâlävdikodde já stivrâ iä olgoštâm väideid AHR 65 miärádâsâst, mon tot adelij njuhčâmáánust 2024. Taat västid mii jieččân ibárdâs tast, ete nággusáid Sämitige vaaljâlävdikode tâi stiivrâ hárjuttem olgooštmist iä lah vuáđustâsah”, iätá Sämitige saavâjođetteijee Pirita Näkkäläjärvi.
Näkkäläjärvi mield oovtviärdásâšvuotâváldálii toimâttâh tiäđuštâlâi AHR:st, lâi-uv tot pahudâm ive 2023 valjáid kyeskee miärádâsâin, ete Sämitige vaaljâlävdikodde tâi stivrâ ličij olgoštâm occeid. AHR adelij 6.5.2024 vástádâs, ete olgoštemkiäldun lohtâseijee uáinuh iä pajanâm eromâšávt oovdân AHR adelem miärádâsâin.
AHR vástádâsâst lii meid merhâšume joođoost orroo poolistutkâmân, mii Laapi poolis tiäđáttâsâi mield čuácá Sämitige vaaljâlävdikoodán já stiivrân 2020–2023, osko saavâjođetteijee Näkkäläjärvi.
Laapi poolis totká Sämitige vaaljâlävdikode já ovdebáá stiivrâ jesânijd epidum rikosijn, ko puohah, kiäh halijdii, iä tuhhiittum ive 2023 sämitiggevaaljâi vaaljâluvâttâlmân. Poolis tiäđáttâs mield vaaljâlävdikode motomeh teikâ puoh jesâneh epiduvvojeh olgooštmist já virgekenigâsvuođâ rikkomist. Ton lasseen poolis tieđettij 27.5.2024, ete meid motomeh teikâ puoh Sämitige stiivrâ jesâneh 2020–2023 epiduvvojeh rikosist. Kiässán ij kuittâg lah tuáistáážân almottum, ete poolis epidičij suu rikosist.
”Olgoštem merkkân poolis vissâ ana tom, ete AHR meridij njuhčâmáánust 65 olmožid maajeeldkietân jienâvuoigâdvuođâlâžžân Sämitige orgaanij miärádâsâi vuástásávt já meridij, ete ive 2023 sämitiggevaaljâid kalga orniđ uđđâsist. Oovtviärdásâšvuotâváldálii tiätupivdem vástádâs mield AHR ij kuittâg jieijâs miärádâsâin uáinám Sämitige vaaljâlävdikode já stiivrâ miärádâsâin maiden olgošteijeid”, paahud saavâjođetteijee Näkkäläjärvi.
Käldee:
– Uđđâ tiäđuh AHR 65 valjâluvâttâllâmmiärádâsâst oovtviärdásâšvuotâváldálii tiätupivdem peht – Sämitige valjâlävdikodde já stivrâ iä olgoštâm väideid (samediggi.fi)
Kove: Ville-Riiko Fofonoff / Sámediggi | Saamelaiskäräjät