Vielgis táálu haalijd, ete Ovtâstum staatâi komovuotâhaldâttâh NASA vuáđudičij äigistiellâs Mánudâžân.
”Tastko NASA, priivaat irâttâsah já komovuotâhaldâttuvah pirrâ maailm vuávájeh kirdemijd Mánudâžân, te torvolâšvuođâ já tärkkivuođâ tááhust lii tergâd, ete mij vuáđudep äigistandardijd Eennâmpáálu ulguubel”, muštâlij Vielgis táálu teknologiavirgeomâháá OSTP ovdâsteijee Steve Walby.
Äigistielâsân lii väljejum nommâ Coordinated Lunar Time (LTC) ađai koordinistum mánudâšäigi. Mánudáá äigistiellâs puáhtá rekinistiđ Coordinated Universal Time (UTC) ađai koordinistum almosääigi vuáđuld, mii lii kiävtust meiddei Aalmugijkoskâsii komovuotâsajattuvâst.
Äigi jotá eresnáál komovuođâst ko Eennâmpáálu alne. Mánudáást jyehi Eennâmpáálu pirrâmpeivi jotá ucánjáhháá – tärkkilávt 58,7 mikrosekuntid – jotelubbooht ko Enâmist.
Eennâmpáálust ääigi mittedmân kiävttojeh aatoomkiäluh pirrâ plaaneet. Jis tagareh kiäluh stellejuuččii Mánudâžân, te 50 ive keččin toh jođáččii oovtâ seekunt jotelubbooht ko Eennâmpáálust. Uđđâ äigistiellâs ulmen lii väldiđ huámášumán taam iäru ääigi kulâmist Eennâmpáálu já Mánudáá kooskâst.
NASA lii meridâm väldiđ uđđâ äigistiellâs kiävtun ive 2026, kuás Ovtâstum staatâin ličij tárguttâs olášuttiđ vuosmuu almaidittum mánudâškirdem ive 1972 maŋa.
Käldee:
– USA haluaa Kuulle oman aikavyöhykkeen (www.hs.fi)
Kove: Jcpag2012 (Wikimedia Commons)