Vyesimáánu 26. peeivi 2024 tollui šoŋŋâdâhsymposium Anarist Sajosist. Tom uárnejii AHR ađai alemus haldâttâhriehti já Sämitigge. Symposium ulmen lâi kieđâvuššâđ šoŋŋâdâhnubástus, pirâskoččâmušâid já eennâmkevttim sämikuávlust. Symposium tollui EU-enâmij alebij haldâttâhtuámustoovlij tuámáráid.
Šoŋŋâdâhsymposiumist savâstâllui tast, maht luándu maaŋgâhámásâšvuođâ kiäppánem vaaigut sämmilij elimân. Kiäppánem vaaigut tagaráid lavváid já riehtiprinsiipáid, moh lohtâseh iäláttâssáid já sämmilii puásuituálu eennâmkevttimân. Luándu maaŋgâhámásâšvuođâ kiäppánem vaaigut meid šoŋŋâdâhtoimáid arktisii kuávlust.
AHR já Sämitige ornim šoŋŋâdâhsymposiumist lijjii suullân 60 kyessid ACA-Europest, ađai EU staatârääđi já alebij haldâttâhtuámustovlij littoost. Kyesih lijjii ACA-Europe jeessântuámustoovli presidenteh, saavâjođetteijeeh já tuámáreh. Tilálâšvuođâst sahâvuáru tooláin Sämitige saavâjođetteijee Pirita Näkkäläjärvi já aairâs Inka Musta.
Pirita Näkkäläjärvi muštâlij eres lasseen tast, ete ”lii tehálâš savâstâllâđ syemmilii já eurooplii ohtsâškode kuávdáš ulmuigijn. Mij tuáivup, ete mij puávtáččijm pyehtiđ EU-enâmij alemuid haldâttâhtuámustovlijd vuáđulijd tiäđuid sämmilij eellimvyevist, kuulmâ Suomâst sarnum sämikielâst já puoh ärbivuáválijn iäláttâsâin, moi suojâlem já ovdedem láá eellimiähtun sämmilij algâaalmug puátteevuotân.”
ACA-Europe joođhij čuákkimijdis vala vyesimáánu 27.–28. peeivi Anarist. Symposium kulá sierânâs tilálâšvuođáid, moh láá uárnejum ACA-Europe kyevti ive kukkosii saavâjođetteijeepaje čuákkimij ohtâvuođâst.
Käldee:
– KHO ja Saamelaiskäräjät järjestivät ilmastosymposiumin EU-maiden tuomareille (samediggi.fi)
Kove: Ville-Riiko Fofonoff / Sámediggi | Saamelaiskäräjät